Farg‘ona va Namanganda 22 ming aholi yangi suv tarmog‘iga ulandi
O‘zbekistonda JTI ko‘magida Farg‘ona va Namangan viloyatlarida 112 km dan ortiq suv taqsimlash tarmoqlari qurildi. Loyiha 2028-yilgacha davom ettiriladi, Osiyo taraqqiyot banki esa qishloq hududlaridagi suv va sanitariya yechimlarini qo‘llab-quvvatlashga tayyorligini bildirdi.
2026-yil 12-oktabr kuni Toshkentda bo‘lib o‘tgan tadbirda JTI direktorlar kengashi raisi Shigeaki Okamoto kompaniyaning O‘zbekistondagi ichimlik suvi, sanitariya va gigiyena dasturi 2027–2028-yillarda ham davom etishini ma’lum qildi, deya xabar berdi Kursiv Uzbekistan muxbiri.
Japan Tobacco International (JTI) — xalqaro tamaki kompaniyasi bo‘lib, O‘zbekistonda WASH, ya’ni ichimlik suvi, sanitariya va gigiyena yo‘nalishidagi loyihalarni ham amalga oshirmoqda.
Shuningdek, o‘qing: O‘zbekistonda suv ta’minotini yaxshilash uchun 38 trln so‘m yo‘naltiriladi
Loyiha 22 mingdan ortiq aholini qamrab oldi
Okamotoning aytishicha, Farg‘ona va Namangan viloyatlarida 112 km dan ortiq suv tarmoqlari qurilib, 22 mingdan ziyod aholi xavfsiz ichimlik suvidan foydalanish imkoniga ega bo‘lgan. 2026-yil oxirigacha loyiha qamrovi 26 mingdan ortiq kishiga yetishi kutilmoqda.
«Biz JTI WASH dasturini 2027–2028-yillarda yangi ikki yillik bosqichda davom ettiramiz. Bu qaror bilan O‘zbekistondagi ichimlik suvi, sanitariya va gigiyena tashabbuslariga jami investitsiyamiz kamida $2,8 mlnga yetadi», — dedi Okamoto.
Uning so‘zlariga ko‘ra, loyiha faqat yangi tarmoqlar qurish bilan cheklanmaydi. Mahalliy hamjamiyatlarda suv tizimlarini boshqarish va ularga texnik xizmat ko‘rsatish mexanizmlari ham shakllantirilmoqda.
OTB qishloqlar uchun alohida yechimlarni muhim deb hisoblaydi
Osiyo taraqqiyot banki vakili Massimo Petroni suv va sanitariya tizimlarini rivojlantirishda qishloq hududlariga alohida e’tibor qaratish kerakligini ta’kidladi. Uning fikricha, shaharlardagi markazlashgan infratuzilmadan foydalana olmaydigan aholi uchun markazlashmagan suv va sanitariya yechimlarini rivojlantirish zarur.
«Qishloq loyihalari juda muhim, chunki ular shahar infratuzilmasidan foydalana olmaydigan aholini qamrab oladi. Osiyo taraqqiyot banki ushbu yo‘nalishda treninglar, salohiyatni oshirish va kelgusida moliyalashtirish orqali ko‘mak berishga tayyorligini bildirdi», — dedi Petroni.
Petroni, shuningdek, suv sohasida tizimlarning barqaror ishlashi, texnik xizmat ko‘rsatish va tarif islohotlarini davom ettirish muhimligini qayd etdi.
Avvalroq «Kursiv» Koreyaning K-water kompaniyasi O‘zbekistonda suv xo‘jaligini rivojlantirishga ko‘maklashishi haqida yozgan edi.
