O‘zbekistonda data-markazlar uchun 6 mlrd dollardan ortiq sarmoya rejalashtirilgan
O‘zbekistonda yangi data-markazlar qurish bo‘yicha investitsiya majburiyatlari $6 mlrddan oshdi. Bu haqda Euronews O‘zbekiston Raqamli texnologiyalar vazirligi ma’lumotlariga tayanib xabar berdi.
Mamlakat sun’iy intellektni rivojlantirish uchun zarur hisoblash quvvatlarini ichki bozorda yaratishga harakat qilmoqda. Hozir ayrim infratuzilmalar allaqachon ishlamoqda, yirik tijorat data-markazlari esa qurilish bosqichida.
Nvidia asosidagi davlat klasteri 90% yuklangan
2026-yil yozida hukumat ehtiyojlari uchun Nvidia texnologiyalari asosida yangi hisoblash klasteri ishga tushirilgan.
Raqamli texnologiyalar vaziri Sherzod Shermatovning aytishicha, ushbu klaster ishga tushganidan keyingi birinchi oyning o‘zida 90% yuklama bilan ishlagan.
«Bizda hukumat ehtiyojlariga xizmat qiladigan davlat data-markazi bor va u yerda Nvidia chiplari o‘rnatilgan. Hozir keyingi bosqichni xarid qilish jarayonidamiz», – dedi vazir.
Bu vazirlik fikricha, O‘zbekistonda hisoblash quvvatlariga talab yuqori ekanini ko‘rsatmoqda.
DataVolt Toshkentda 12 MWlik data-markaz qurmoqda
Saudiya Arabistonining DataVolt kompaniyasi Toshkentda 12 MW quvvatga ega data-markaz qurmoqda. U sun’iy intellekt va katta hajmdagi hisoblashlarni talab qiladigan xizmatlarga mo‘ljallangan.
Loyihaning birinchi bosqichini 2026-yil oxirigacha ishga tushirish rejalashtirilgan.
Loyiha uchun Yevropa tiklanish va taraqqiyot banki, Germaniyaning DEG, Fransiyaning Proparco va OPEC xalqaro taraqqiyot jamg‘armasi ishtirokidagi xalqaro guruh tomonidan $150 mln gacha moliyalashtirish ta’minlangan.
Shermatovning so‘zlariga ko‘ra, kelajakda loyiha quvvati 300 MWgacha yetkazilishi va keyingi bosqichlar boshqa hududlarga ham kengaytirilishi ko‘zda tutilgan.
Qoraqalpog‘istonda ham yirik loyiha amalga oshirilmoqda
Yana bir katta data-markaz loyihasi Qoraqalpog‘istonda Shanghai LinkWise Data Intelligence tomonidan ishlab chiqilmoqda.
Shermatovning ma’lum qilishicha, mamlakat bo‘yicha data-markaz loyihalariga oid umumiy investitsiya majburiyatlari hozir $6 mlrddan oshgan.
Avvalroq Kursiv Uzbekistan nashri talabalar Google Gemini AI Plus’dan 1 yil bepul foydalanishi haqida yozgan edi.
