Ilon Mask AQShdagi har bir bolaga SpaceX aksiyasini bermoqchi
SpaceX asoschisi Ilon Mask 2027-yilda AQShdagi har bir bolaga kompaniyaning bittadan aksiyasini sovg‘a qilish niyatini bildirdi. U bu haqda X ijtimoiy tarmog‘idagi sahifasida yozdi.
«Kelasi yili Amerikadagi har bir bolaga SpaceX’dagi aksiyalarimdan bittadan beraman. Bu ko‘plab shunday tashabbuslarning birinchisi bo‘ladi», — deb yozdi Mask.
Dastur $10,5 mlrdga baholanmoqda
AQSh Aholini ro‘yxatga olish byurosi ma’lumotlariga ko‘ra, mamlakatda 18 yoshga to‘lmagan qariyb 72 mln kishi yashaydi. SpaceX aksiyasining 16-oktabrdagi $146,03 yopilish narxi asosida hisoblanganda, har bir bolaga bittadan aksiya berish dasturining umumiy qiymati taxminan $10,5 mlrdni tashkil etishi mumkin.
Biroq yakuniy summa aksiyalar tarqatiladigan paytdagi narx va kimlar dasturga kiritilishiga bog‘liq bo‘ladi.
Next year, I will give one of my SpaceX shares to every kid in America. This will be the first of many.
— Elon Musk (@elonmusk) October 19, 2026
Kimlar aksiya olishi hali noma’lum
Mask hozircha dasturning aniq mexanizmini ochiqlamadi. Xususan, «Amerikadagi har bir bola» deganda faqat AQSh fuqarolari nazarda tutiladimi yoki mamlakatda yashovchi barcha voyaga yetmaganlar qamrab olinadimi — bu masalaga aniqlik kiritilmagan.
Aksiyalar bolalarga qanday hisob orqali berilishi va ularni qachondan tasarruf etish mumkinligi ham hozircha ma’lum emas.
Maskning SpaceX’dagi ulushi katta
AQSh Qimmatli qog‘ozlar va birjalar komissiyasiga taqdim etilgan hujjatlarga ko‘ra, Maskning SpaceX’dagi benefitsiar egaligi 6,42 mlrd aksiyani tashkil etadi. Shundan qariyb 4,77 mlrd aksiya trastlar orqali uning nazoratida.
Avvalroq «Kursiv» SpaceX ilk bor Starship’ni parvozdan keyin bazaga qaytargani haqida yozgan edi.
