Nio’ning Nio Firefly brendi 60 kWh sig‘imli yangi CATL batareyasiga ega versiyani taqdim etdi. Bu haqda CarNewsChina nashri xabar bermoqda.
Yangi akkumulyator avtomobilning CLTC bo‘yicha yurish zaxirasini 420 km dan 560 km gacha oshiradi. Firefly 60 kWh sig‘imli yangi CATL uch komponentli litiy batareyasini rasman taqdim etdi.
Yangi batareya avvalgi versiyaga nisbatan katta sig‘imga ega bo‘lsa-da, uning tashqi o‘lchamlari va avtomobilning vazni o‘zgarmagan.
Yurish zaxirasi 560 km gacha oshdi
Yangi 60 kWh batareya bilan Firefly’ning CLTC standarti bo‘yicha yurish zaxirasi 420 km dan 560 km gacha yetdi.
WLTP bo‘yicha bu taxminan 454 km ga teng.
Batareyada energiya zichligi 187,2 Vt·soat/kg bo‘lgan uch komponentli litiy elementlar ishlatilgan. Hajmdan foydalanish samaradorligi esa 73,4 foizni tashkil etadi.
Firefly ma’lumotiga ko‘ra, batareya turli ekspluatatsiya sharoitlarida ishonchlilikni ta’minlash uchun milliy standartlardan yuqori darajadagi sinovlardan o‘tkazilgan.
Narxi 136,8 ming yuandan boshlanadi
60 kWh batareyali Firefly’ni to‘liq sotib olish narxi 136,8 ming yuandan, ya’ni qariyb $20,4 mingdan boshlanadi.
Taqqoslash uchun, amaldagi 2026-yilgi Firefly versiyalari 119,8 mingdan 125,8 ming yuangacha, ya’ni taxminan $17,9–18,8 ming oralig‘ida taklif qilinmoqda.
Batareyani ijaraga olish ham mumkin
Yangi 60 kWh akkumulyator BaaS — Battery-as-a-Service tizimi orqali ham taklif qilinadi.
Batareyani ijaraga olish oyiga 599 yuan, ya’ni qariyb $90 turadi. Hozirgi Firefly batareyasi uchun oylik ijara to‘lovi 399 yuan yoki qariyb $60 ni tashkil etadi.
Shuningdek, cheklangan muddatli aksiya doirasida to‘rt oy uchun to‘lov qilgan mijozlarga bir oy bepul xizmat taqdim etiladi.
Eski Firefly egalari ham batareyani almashtira oladi
Yangi 60 kWh batareya avval sotilgan Firefly avtomobillariga ham mos keladi.
BaaS xizmatidan foydalanayotgan mijozlar batareyani yangilash uchun 3 ming yuan, ya’ni qariyb $450 servis to‘lovi to‘lashi kerak.
Batareyani avtomobil bilan birga to‘liq sotib olgan egalarga esa sig‘im farqi uchun 17 ming yuan yoki taxminan $2,5 ming to‘lash talab etiladi.
Avtomobil o‘lchamlari o‘zgarmadi
Firefly’ning uzunligi 4 003 mm, eni 1 781 mm, balandligi 1 557 mmni tashkil etadi. G‘ildirak bazasi 2 615 mm.
Old bagaj hajmi 92 litrni tashkil qiladi.
Hozircha Firefly batareyalarini faqat Nio’ning beshinchi avlod batareya almashtirish stansiyalarida almashtirish mumkin. Bunday stansiyalar soni hozircha ko‘p emas, biroq batareyani almashtirish tizimi kelajakda avtomobilning yurish zaxirasini yangilashni osonlashtirishi mumkin.
Avalroq Kursiv Uzbekistan naşri Firefly 60 kWh batareyali yangi versiyani olişi haqida yozgan edi.
