Hyundai Porter avtomobili yana ishlab chiqarilish uchun Qozog‘istonga qaytdi. Bu haqda Motor.ru nashri xabar bermoqda.
Endi u Qozog‘istonda, Almatidagi Hyundai Trans Almaty zavodida yig‘iladi. Ishlab chiqarish to‘liq siklda olib boriladi. Kuzovni payvandlash va bo‘yash ham shu yerning o‘zida amalga oshiriladi.
Zavodni yangilash uchun 12,8 mlrd tenge investitsiya kiritildi. Bu mablag‘ evaziga Qozog‘istonda ilk bor kataforez bo‘yoq sexi va yangi rama ishlab chiqarish liniyasi ishga tushirilgan.
Hyundai Porter modelining eng katta afzalliklaridan biri uning nisbatan arzon narxi bo‘lib, u 14 mln tengedan (taxminan $27 ming) boshlanadi.
Sotuvlar iyun oyida boshlanadi. Xaridorlarga ikki yil yoki 150 ming kilometr kafolat beriladi.
Porter 2,5 litrli 130 ot kuchiga ega bo‘lgan ishonchli turbodizel dvigatel bilan taqdim etiladi. Dastlab u faqat bitta to‘plamda chiqariladi: konditsioner, yorug‘lik sensori, audio tayyorlik va uch kishilik kabina bilan. Mashinaning to‘liq narxlari va texnik xususiyatlari bu oy oxirigacha e’lon qilinadi.
Hyundai – Janubiy Koreyaning yirik avtomobil ishlab chiqaruvchisi bo‘lib, 1967-yilda asos solingan. Kompaniya jahon bozorida raqobatbardosh, texnologik va tejamkor modellari bilan tanilgan. Uning mashhurligi ixcham shahar avtomobillaridan tortib, zamonaviy krossoverlargacha bo‘lgan keng turdagi mashinalar orqali oshgan. Hyundai so‘nggi yillarda elektromobillar va ilg‘or xavfsizlik tizimlariga katta e’tibor qaratmoqda. Brend global bozorda sifat, ishonchlilik va innovatsiyalar bilan ajralib turadi.
Eslatib o‘tamiz, Kursiv Uzbekistan nashri Hyundai Ioniq 6 N elektromobilining ilk suratlari e’lon qilingani haqida yozgan edi.
