Motorola kompaniyasi o‘zining yangi arzonroq, biroq imkoniyatlari flagmanlarga teng smartfoni – Moto G100 Pro modelini taqdim etdi. Bu haqda Gizmochina nashri ma’lum qildi.
Moto G100 Pro 6,67 dyuymli AMOLED-displeyga ega bo‘lib, uning aniqligi 1,5K (2712 × 1220 piksel), yangilanish chastotasi esa 120 Gs. Ekran maksimal 4500 nit yorqinlikda ishlaydi va Gorilla Glass 7i bilan himoyalangan. Displeyga o‘rnatilgan barmoq izi skaneri va Dolby Atmos texnologiyasini qo‘llab-quvvatlaydigan ikkita dinamikli stereo ovoz tizimi smartfonga yuqori media tajribasini taqdim etadi.
Suratga olish borasida qurilma 32 megapikselli selfi kameraga ega. Orqa tomonida esa 50 MP Sony LYT-600 sensorli asosiy kamera va 8 MP ultra keng burchakli modul joylashgan.
Smartfon ichida MediaTek Dimensity 7300 protsessori joylashgan bo‘lib, u 8 yoki 12 GB tezkor xotira va 256 yoki 512 GB doimiy xotira bilan to‘ldiriladi. Akkumulyator sig‘imi 6720 mA/soat bo‘lib, 30 Vt tezkor zaryadlashni qo‘llab-quvvatlaydi.
Qurilma Android 15 operatsion tizimida, Motorola’ning yangi Hello UI interfeysi bilan ishlaydi. U IP68/IP69 muhofaza darajasiga va MIL-STD 810H harbiy standartiga mos keladi, ya’ni suv va changga chidamli.
Smartfonning og‘irligi 198 gramm, korpus qalinligi esa bor-yo‘g‘i 7,87 mm. Narxi atigi $195 dan boshlanadi.
Avvalroq Kursiv Uzbekistan 115 dollarlik Infinix Hot 60i taqdim etilgani haqida xabar bergan edi.
