Realme yangi Realme 15T smartfonini taqdim etdi. Bu haqda Gizmochina ma’lum qildi.
Asosiy e’tibor 7000 mA·soat sig‘imli batareyaga qaratilgan. Kompaniya vakillari uni bunday quvvatga ega eng yengil smartfon sifatida ta’riflamoqda. Qurilma 60 Vt tezkor zaryadlash va 6 Vt quvvatda teskari zaryadlashni qo‘llab-quvvatlaydi.
Smartfon 6,57 dyuymli AMOLED displey bilan jihozlangan. Uning imkoniyati 2372×1080 piksel, yangilanish chastotasi esa 120 Hz. Ekran yorqinligi 4000 nitga yetadi, PWM chastotasi 2160 Hzga teng.
Smartfonning asosiy va old kamerasi 50 MP OmniVision OV50D40 sensorga ega. Orqa blokda qo‘shimcha 2 MP mono sensor mavjud. Qurilma MediaTek Dimensity 6400 Max protsessori asosida ishlaydi, sovitish uchun 6050 mm² maydonga ega bug‘ kamerasi o‘rnatilgan.
Realme 15T Android 15 operatsion tizimida Realme UI 6 interfeysi bilan ishlaydi. Kompaniya uchta yirik Android yangilanishi va qo‘shimcha bir yil xavfsizlik yangilanishlarini va’da qilmoqda. Smartfon stereodinamiklar, ekran osti barmoq izi skaneri va IP69 darajasidagi himoyaga ega. O‘lchamlari 158,36 x 75,19 x 7,79 mm. Og‘irligi 183 grammni tashkil etadi.
Narxi ham arzon: 8/128 GB versiyasi $240, 12/256 GB to‘liq komplektatsiyasi esa $285 etib belgilangan.
Eslatib o‘tamiz, Kursiv Uzbekistan 7000 mA/soat sig‘imli batareyaga ega Oppo A6 GT 5G smartfoni taqdim etilgani haqida yozgan edi.
