Vivo kompaniyasi tomonidan Vivo X300 va X300 Pro smartfonlari Yevropada taqdim etildi. Bu haqda GSMArena xabar bermoqda.
Ma’lum qilinishicha, rasmiy taqdimot Avstriya poytaxti Venada o‘tkazilgan. Ikkala model ham 90 vattli simli va 40 vattli simsiz zaryadlash tizimlarini qo‘llab-quvvatlaydi. Vivo X300 6,31 dyuymli, X300 Pro esa 6,82 dyuymli OLED displey bilan jihozlangan. Har ikkisi 120 Hz yangilanish chastotasini ta’minlaydi.
Kamera tizimi
Vivo X300 modelida asosiy kameraga 200 megapikselli Samsung HPB sensori o‘rnatilgan. Unga 50 MP Sony LYT-602 (telefoto) va 50 MP ultra keng burchakli modul hamroh bo‘ladi.
Vivo X300 Pro esa teskari konfiguratsiyaga ega: asosiy modulda 50 MP Sony LYT-828, telefoto blokda 200 MP Samsung HPB, ultra keng burchakli modulda esa Samsung JN1 sensori ishlatiladi. Har ikkala smartfon old kamerasi ham 50 MP Samsung JN1 sensori bilan jihozlangan.
Tizim va ishlash
Yangi flagmanlar MediaTek Dimensity 9500 protsessori asosida yaratilgan. Ular Android 16 tizimida ishlovchi OriginOS 6 interfeysi bilan global miqyosda taqdim etildi. Kompaniya foydalanuvchilarga 5 yil tizim yangilanishi va 7 yil xavfsizlik yangilanishini va’da qilmoqda.
Akkumulyator va farqlar
Yevropa versiyalarida batareya sig‘imi Xitoydagidan kichikroq:
Vivo X300 – 5360 mA/soat (Xitoyda 6040 mA/soat);
Vivo X300 Pro – 5440 mA/soat (Xitoyda 6510 mA/soat).
Narxlar:
| Model | Xotira konfiguratsiyasi | Yevropa narxi | Xitoy narxi (AQSh dollari) | Farq |
|---|---|---|---|---|
| Vivo X300 | 12 GB / 256 GB | 1050 yevro | $620 | ≈ 1,7 baravar qimmat |
| Vivo X300 | 16 GB / 512 GB | 1100 yevro | $745 | ≈ 1,5 baravar qimmat |
| Vivo X300 Pro | 16 GB / 512 GB | 1400 yevro | $845 | ≈ 1,65 baravar qimmat |
Eslatib o‘tamiz, Kursiv Uzbekistan Vivo S50 Pro Mini smartfoni qanday xususiyatlarga ega bo‘lishi haqida yozgan edi.
