Menemen – Turkiyaning mashhur milliy nonushtasi bo‘lib, u tuxum, pomidor va bulg‘or qalampiri bilan tayyorlanadi. Bu taom nonushtaga eng mos bo‘lgan, mazali va tez tayyorlanadigan yeguliklardan biridir. Menemenning o‘ziga xosligi shundaki, u har doim yangi va iliq holda dasturxonga tortiladi.
Masalliqlar
| Masalliq | Miqdor |
|---|---|
| Qizil bulg‘or qalampiri | 1 dona |
| Pomidor | 300 gramm |
| Piyoz | 100 gramm |
| Achchiq qalampir | kichikroq, 1 dona |
| Tuxum | 3-4 ta |
| Sariyog‘ | 30 gramm |
| Tuz | Ta’bga qarab |
Tayyorlanish bosqichlari
1-qadam: Bulg‘or qalampirini urug‘idan tozalab, mayda to‘rtburchak shaklida to‘g‘raymiz.
2-qadam: Pomidor va piyozning po‘stini archib, ularni ham mayda to‘rtburchak qilib to‘g‘raymiz. Achchiq qalampirni halqasimon shaklda kesamiz.
3-qadam: Tovaga sariyog‘ solib, eritib olamiz. Piyozni qo‘shib, 2-3 daqiqa davomida qovurib olamiz. So‘ng bulg‘or qalampiri va pomidorni solib, 5 – 7 daqiqa dimlab pishiramiz.
4-qadam: Tuxumlarni tovaga solib, darhol aralashtiramiz. Muntazam aralashtirib, 3 daqiqa davomida dimlab pishiramiz. Ta’bga qarab tuz sepamiz. Agar tuxum sarig‘ini butun holda qoldirishni xohlasangiz, avval tuxum oqini solib aralashtiring, so‘ng tuxum sarig‘ini qo‘shing.
Muhim: Olovni o‘chirganda tuxumlar biroz suyuq holatda qolishi kerak. Taomni non bilan birga dasturxonga torting.
Yoqimli ishtaha!
