25-yanvar kuni Las-Vegasda o‘zbekistonlik bokschi Isroil Madrimov professional ringga muvaffaqiyatli qaytdi. U Dominikan Respublikasi vakili Luis Salasar ustidan ochkolar hisobiga ishonchli g‘alaba qozondi.
Jang deyarli ilk daqiqalardanoq Madrimov nazorati ostida o‘tdi. U birinchi raqamda ishladi, ring markazini egallab oldi va doimiy ravishda jeb orqali raqibini bosim ostida ushlab turdi. Madrimov masofa va tempni mohirona boshqardi, Salasarga kuchli hujumli boksni majburlash imkonini bermadi.
Salasar, asosan, qarshi hujumlarga tayanib harakat qildi va alohida zarbalar bilan javob qaytarishga urindi. Biroq uning ko‘pchilik hujumlari Madrimovning ishonchli himoyasida to‘xtab qoldi. Jangning ikkinchi yarmida o‘zbekistonlik bokschining ustunligi yanada yaqqol sezildi. Faollik va aniqlik farqi ochiq ko‘rindi.
Nokdaunlar qayd etilmadi. Shunga qaramay, hakamlar yakdil qaror bilan g‘alabani Madrimovga berdi. 99:91 hisob jangdagi sinf va taktik intizomdagi farqni to‘liq aks ettirdi.
Bu jang Madrimov uchun 2025-yil fevralida Vergil Ortisga uchragan mag‘lubiyatdan keyingi ilk ringga chiqish bo‘ldi. O‘shanda u hakamlarning bir ovozdan chiqargan qaroriga ko‘ra yutqazgandi. Salasar ustidan qozonilgan g‘alaba Madrimovga omadsiz seriyani yopish va yuqori darajadagi janglar poygasiga qaytish imkonini berdi.
Eslatib o‘tamiz, Kursiv Uzbekistan nashri Ruslan Abdullayev navbatdagi jangini AQShda o‘tkazgani haqida yozgan edi.
