Tesla o‘zining birinchi to‘liq avtonom avtomobili — Cybercab ishlab chiqarilganini e’lon qildi. Ushbu model Tesla tarixidagi birinchi rulsiz va pedalsiz avtonom avtomobil bo‘lib, yo‘lovchilarni inson yordamisiz olib yurishga mo‘ljallangan.
Dizayn va salon xususiyatlari
Cybercab ikki o‘rindiqli, kompakt coupe ko‘rinishida bo‘lib, yuqoriga ochiladigan «butterfly» eshiklar bilan jihozlangan. Rulsiz dizayn salonni keng ko‘rsatadi, o‘rindiqlar orasida 20,5 dyuymli katta ekran o‘rnatilgan. Yo‘lovchilar ekran orqali filmlar tomosha qilishlari, xaritani tekshirishlari mumkin. Avtomobil esa rulni o‘zi boshqaradi. Avtomobil bagaji ham kattagina, bir nechta sumka bemalol sig‘adi.
Ishlab chiqarish usuli
Tesla Cybercab ishlab chiqarishda «Unboxed» deb nomlangan yangi usulni qo‘llamoqda. An’anaviy yig‘ish liniyasi o‘rniga, avtomobilning turli qismlari alohida joylarda tayyorlanadi: tomonlar, pol va o‘rindiqlar alohida ishlab chiqariladi va oxirida birlashtiriladi. Bu usul zavod maydonini tejash va har bir avtomobil ishlab chiqarish xarajatini kamaytirish uchun joriy etilgan. Kompaniya ushbu usul yordamida har yili millionlab avtomobillar ishlab chiqarishni rejalashtirmoqda.
Texnik xususiyatlar
Cybercab 35 kVt/soatli batareya bilan jihozlangan bo‘lib, to‘liq zaryad bilan taxminan 320 km yo‘l bosadi. Avtomobil 0 dan 97 km/soatgacha 7 soniyadan kam vaqt sarflaydi, maksimal tezligi 161 km/soat. Vazni 1,134–1,360 kg orasida.
Avtonom tizim va xavfsizlik
Cybercab Tesla Full Self-Driving (FSD) tizimidan foydalanadi. Boshqa Tesla avtomobillarida inson haydovchi yo‘lni kuzatishi shart bo‘lsa, rulsiz Cybercabda dastur mukammal ishlashi lozim. NHTSA va boshqa hukumat xavfsizlik guruhlari tizimni tekshirmoqda, chunki avtomobilning xavfsizligi inson boshqaruviga qaraganda yuqori darajada bo‘lishi kerak.
Narx va ekspluatatsiya xarajatlari
Tesla Cybercabni arzon narxda sotishni rejalashtirmoqda — taxminiy narxi €26,000 dan past. Avtomobilning ishlash xarajati ham past bo‘lib, taxminan €0,10/km. Shuningdek, u simsiz zaryadlashni qo‘llab-quvvatlaydi, batareyani maxsus pad ustida to‘liq quvvatlash mumkin.
Ishlab chiqarish rejasi
Ilon Mask ishlab chiqarish dastlab sekin kechishini, chunki kompaniya yangi ishlab chiqarish uskunalarini o‘rganayotgani va ularni mukammal ishlashini ta’minlash vaqt talab qilishini aytdi. Yakuniy maqsad — har yili 5 mln avtonom elektr avtomobil ishlab chiqarish, ammo hozirgi kunda faqat bir nechta Cybercab chiqdi xolos. Ommaviy ishlab chiqarish aprel oyida boshlanadi.
Eslatib o‘tamiz, avvalroq Tesla Semi elektr yuk avtomobilini ishlab chiqarishni boshlashi haqida yozgan edik.
