Samsung Electronics Galaxy S26 Ultra’ni sun’iy intellekt imkoniyatlariga urg‘u berilgan, kuchli protsessor va mobil qurilmalarda ilk bor joriy etilgan «Maxfiy ekran» funksiyasi bilan taqdim etdi. Qurilma kundalik foydalanishda maksimal qulaylik va xavfsizlikni ta’minlashga qaratilgan.
Nafis dizayn va mustahkamlik
Smartfon 7,9 mm qalinlik va 214 gramm vazn bilan yanada yupqa va yengil bo‘lgan. Yangi shisha kamera bloki korpus dizayniga uyg‘un integratsiya qilingan. Qurilma binafsha, qora va oq ranglarda taklif etiladi. Oldingi avlodga nisbatan u 0,7 mm yupqaroq va 18 gramm yengilroq.
Maxfiy ekran — mobil bozorda ilk bor
Galaxy S26 Ultra’ning asosiy yangiliklaridan biri — ichki o‘rnatilgan maxfiy ekran rejimi. Funksiya yoqilganda, displey yon tomondan qaralganda xiralashadi yoki umuman ko‘rinmaydi. Foydalanuvchi butun ekran, alohida ilovalar, kiruvchi bildirishnomalar, PIN-kod va parollarni yashirishni tanlashi mumkin. Ma’lumotlar xavfsizligi Samsung Knox himoya tizimi orqali qo‘shimcha mustahkamlangan.
Eng kuchli Galaxy protsessori
Model Snapdragon 8 Elite Gen 5 for Galaxy chipi bilan ishlaydi. Yangi arxitektura NPU unumdorligini 39 foizga, GPU’ni 24 foizga va CPU’ni 19 foizga oshirgan. Katta o‘lchamdagi yangilangan Vapor Chamber sovitish tizimi issiqlikni 21 foiz samaraliroq tarqatadi. Qurilma og‘ir o‘yinlar va ko‘p vazifali ishlashda barqaror natija ko‘rsatadi.
Displey sifati va tasvir aniqligi
6,9 dyuymli Dynamic AMOLED 2X ekran rang chuqurligini to‘rt baravar aniqroq uzatadi. mDNIe texnologiyasi va ProScaler algoritmi tasvirni real vaqt rejimida qayta ishlab, yanada tiniq va jonli ko‘rsatadi.
200 MP kamera va Nightography
Asosiy 200 MP keng burchakli kamera F1.4 diafragma bilan 47 foiz ko‘proq yorug‘lik qabul qiladi. 50 MP teleobyektiv esa 37 foizga yorqinroq tasvir beradi. Nightography texnologiyasi past yorug‘likda ham aniq va shovqinsiz video yozishni ta’minlaydi.
100 karra Space Zoom AI yordamida uzoq obyektlarni aniqlik bilan suratga olish imkonini beradi. Super Steady rejimi esa harakat paytida ham barqaror video yozadi.
Ultra tez zaryad va uzoq ishlash vaqti
5000 mAh batareya 31 soatgacha video ko‘rish imkonini beradi. Super Fast Charging 3.0 orqali qurilma 30 daqiqada 75 foizgacha quvvatlanadi.
Galaxy AI va aqlli yordamchilar
Galaxy AI tizimi Photo Assist orqali matnli buyruqlar asosida suratlarni tahrirlash imkonini beradi. Creative Studio yordamida surat va eskizlardan stikerlar yaratish mumkin. Now Nudge va Now Brief funksiyalari real vaqt tavsiyalari va kundalik eslatmalarni taklif qiladi. Shuningdek, Bixby yordamchisi qurilma sozlamalarini boshqarishda va tezkor javob topishda yordam beradi. Foydalanuvchi ma’lumotlari qurilma ichida shifrlanib saqlanadi va qayta ishlashni bulut yoki lokal rejimda tanlash imkoniyati mavjud.
Xotira va imkoniyatlar
Model 256 GB, 512 GB va 1 TB xotira variantlarida taqdim etiladi. 16 GB tezkor xotirali 1 TB versiya o‘yin, 4K video va katta hajmdagi fayllar bilan ishlovchilar uchun mo‘ljallangan.
Galaxy S26 Ultra — bu nafaqat kuchli flagman, balki xavfsizlik, sun’iy intellekt va kamera imkoniyatlarini birlashtirgan zamonaviy mobil ekotizim markazi hisoblanadi.
Avvalroq Kursiv Uzbekistan Samsung Galaxy S26 flagmanlari qanday yangiliklar bilan taqdim etilgani haqida yozgandi.
