O‘zbekistonda ko‘pincha Lacetti (Gentra) nomi bilan tilga olinadigan model, hali ham ikkilamchi bozorda faol sotilayotgan avtomobillardan biri hisoblanadi. Uning asosiy ustuni oddiy konstruksiya, keng tarqalgan ehtiyot qismlar va servis infratuzilmasining mavjudligidir. Kursiv Uzbekistan nashrining ushbu maqolasida Chevrolet Gentra avtomobilining sotib olinish sabablari va modelning ustunliklari haqida so‘z boradi.
Maqoladan quyidagilarni bilib olasiz:
Model va ishlab chiqarish konteksti
O‘zbekistonda model uzoq vaqt Lacetti (Gentra) nomi bilan ishlab chiqarildi. 2024-yil 26-iyul kuni Asaka zavodidan tarixdagi so‘nggi Lacetti (Gentra) ishlab chiqarilgani rasman e’lon qilindi. Shundan so‘ng Gentra bozori deyarli to‘liq ikkilamchi segment hisobiga shakllanmoqda.
Texnik ko‘rsatkichlar
2019 – 2024-yillarda ishlab chiqarilgan Gentra’lar asosan bir xil texnik asosga ega. 1,5 litrli, 106 ot kuchiga ega dvigatel va 141 Nm moment modelning yadro konfiguratsiyasini tashkil etadi. Uzatma tanlovi sifatida 5 pog‘onali mexanik yoki 6 pog‘onali avtomat mavjud.
Sedan kuzov 4515 mm uzunlikka ega, 2600 mm g‘ildirak bazasi va 150 mm klirens kundalik sharoit uchun yetarli hisoblanadi. Bagaj hajmi 405 litr bo‘lib, oilaviy foydalanish uchun maqbul ko‘rsatkich beradi.
Rasmiy ma’lumotlarda yonilg‘i sarfi shahar rejimida 8,5 – 10 litr, aralash siklda 6,8 – 7,3 litr atrofida ko‘rsatiladi. Bozorda CNG yoki gaz-benzin variantlari ham uchraydi.
Xavfsizlik
Rasmiy jihozlanishda ABS va 2 ta xavfsizlik yostiqchasi mavjud. Biroq zamonaviy haydovchiga yordam beruvchi tizimlar, masalan, avtomatik tormozlash bu sinf va platformada odatda ko‘zda tutilmagan.
Crash-test masalasida ehtiyotkorlik zarur. Platformadosh modellar bo‘yicha xorijiy testlar mavjud bo‘lsa-da, ular aynan O‘zbekiston konfiguratsiyasiga to‘liq mos kelmaydi. Shuning uchun Gentra’ni zamonaviy xavfsizlik standartlari bilan emas, balki o‘z segmentidagi klassik sedan darajasida baholash to‘g‘riroq bo‘ladi.
Ishonchlilik
Gentra konstruksiyasi oddiy va ko‘pchilik ustalar uchun tushunarli. Bu uning asosiy afzalligi hisoblanadi. Biroq sovitish tizimi elementlari, xususan termostat va radiator, 100 ming km atrofida e’tibor talab qilishi mumkin.
Avtomat uzatmaga ega variantlarda esa yog‘ sizishi bilan bog‘liq individual holatlar forumlarda qayd etilgan. Bu massaviy muammo sifatida ko‘rilmasa-da, ikkilamchi bozorda tekshirish nuqtasi sifatida muhim.
Servis va ehtiyot qismlar
Modelning eng katta ustunliklaridan biri servis infratuzilmasidir. Texnik ko‘rik intervali 7500 km yoki 6 oy etib belgilangan. Kafolat muddati 36 oy yoki 100 ming km bilan cheklangan.
Mahalliy ehtiyot qismlar bozori ushbu model uchun keng. Rasmiy servis markazlari hududlar kesimida mavjud. Shu sabab Gentra ekspluatatsiyasi ko‘plab raqobatchilarga nisbatan oson va nisbatan hamyonbop hisoblanadi.
Narxlar va bozordagi holat
2019 – 2024-yillarda ishlab chiqarilgan avtomobillar ikkilamchi bozorda keng diapazonda taklif etiladi. 2019-yil modellari odatda $6,2 ming – $13,8 ming oralig‘ida uchrasa, 2024-yil ishlab chiqarilgan, probegi past nusxalar $11 ming – $20 ming atrofida sotilmoqda.
Narxdagi farq holat, probeg, CNG mavjudligi, hujjat tozaligi va komplektatsiyaga bog‘liq. Past narxlar ko‘pincha yuqori probeg yoki texnik muammo bilan izohlanadi.
Kimlar uchun mos?
Gentra, avvalo, oddiy va servisga qulay sedan izlayotganlar uchun mos. Kundalik qatnov, oilaviy foydalanish va hatto xizmat avtomobili sifatida ham u o‘zini oqlagan model hisoblanadi.
CNG varianti tufayli yonilg‘i tejamkorligini birinchi o‘ringa qo‘ygan xaridorlar uchun ham qiziqarli. Biroq xavfsizlik texnologiyalari va zamonaviy elektron tizimlar ustuvor bo‘lgan xaridorlar ehtiyotkor qaror qabul qilishi kerak.
Eslatib o‘tamiz, «Kursiv» nashri yangi Gentra 2026 avtomobili O‘zbekistonda ishlab chiqarilmasligi haqida yozgan edi.
