18-martga o‘tar kechasi Yevropa Chempionlar ligasi 1/8 finalining javob uchrashuvlari bo‘lib o‘tdi. Unga ko‘ra, «Real Madrid», PSJ va «Arsenal» ishonchli g‘alabalar bilan, «Sporting» esa kambek orqali chorak final yo‘llanmasini qo‘lga kiritdi.
«Manchester Siti» – «Real Madrid» 1:2 (1:5)
«Real Madrid» safarda «Manchester Siti»ni mag‘lub etib, ketma-ket uchinchi mavsum ingliz klubini turnirdan chiqarib yubordi. O‘yin taqdiriga 20-daqiqada maydon egalari sardori Bernardo Silvaning to‘pni ataylab qo‘li bilan o‘ynagani uchun olgan to‘g‘ridan to‘g‘ri qizil kartochkasi jiddiy ta’sir ko‘rsatdi.
Belgilangan penaltini Vinisius Junior aniq amalga oshirdi. Garchi 41-daqiqada Erling Xoland muvozanatni tiklagan bo‘lsa-da, hakam 2-taymga qo‘shib bergan vaqtda Vinisius o‘zining ikkinchi golini urib, madridliklarning ishonchli g‘alabasini ta’minladi. Abduqodir Husanov o‘yinda to‘liq harakat qilib, birinchi taym so‘ngida sariq kartochka oldi. Sofascore portali uning o‘yinini 7,2 ballga loyiq ko‘rdi.
«Chelsi» – «Pari Sen-Jermen» 0:3 (2:8)
Londonning «Chelsi» klubi o‘z maydonida PSJ jamoasiga yirik hisobda imkoniyatni boy berib, Yevropa kuboklari tarixidagi eng yomon natijalaridan birini qayd etdi. O‘yinning 6-daqiqasidayoq Xvicha Kvaratsxeliya himoyachi Mamadu Sarrning xatosidan unumli foydalanib, hisobni ochdi.
Oradan ko‘p o‘tmay, 14-daqiqada Bredli Barkola jamoasining ikkinchi golini kiritdi. Ikkinchi bo‘limda zaxiradan maydonga tushgan 19 yoshli Senni Mayulu uzoq masofadan ajoyib zarba yo‘llab, o‘yinga yakuniy nuqtani qo‘ydi. Shuningdek, «Chelsi» himoyachisi Trevo Chaloba og‘ir jarohat olib, jamoasini so‘nggi daqiqalarda bir kishi kam bo‘lib o‘ynashga majbur qildi.
«Sporting» – «Budyo-Glimt» 5:0 (5:3)
Lissabonning «Sporting» klubi dastlabki o‘yindagi 0:3 hisobidagi mag‘lubiyatdan so‘ng fantastik kambekni amalga oshirib, o‘z tarixida ilk bor Chempionlar ligasining chorak finaliga yo‘l oldi. Gonsalu Inasiu va Pedru Gonsalvesning gollari hamda Luis Suaresning penaltidan kiritgan to‘pi asosiy vaqtda muvozanatni tiklashga yordam berdi.
Asosiy vaqtdan keyingi qo‘shimcha bo‘limlarning 92-daqiqasida Maksi Arauxo mezbonlarni umumiy hisobda oldinga olib chiqdi. 121-daqiqada esa Rafael Nel beshinchi golni urib, norvegiyaliklarning Chempionlar ligasidagi ertagiga barham berdi.
«Arsenal» – «Bayer» 2:0 (3:1)
Londonning «Arsenal» klubi o‘z muxlislari ko‘z o‘ngida Leverkuzenning «Bayer» jamoasini ishonchli tarzda mag‘lub etdi. 36-daqiqada Eberechi Eze jarima maydonchasi tashqarisidan kuchli zarba yo‘llab, Chempionlar ligasidagi debyut golini kiritdi.
Ikkinchi bo‘lim o‘rtalarida, 63-daqiqada Deklan Rays nemis klubi himoyachilarining xatosidan so‘ng to‘pni darvoza burchagiga aniq joylab, umumiy hisobdagi ustunlikni mustahkamladi. Ushbu g‘alabadan so‘ng «Arsenal» chorak finalda Portugaliyaning «Sporting» klubiga qarshi maydonga tushishi ma’lum bo‘ldi.
Avvalroq Kursiv Uzbekistan Chempionlar ligasining 1/8 final dastlabki uchrashuvlari haqida xabar bergan edi.
