X platformasi foydalanuvchilar uchun yangi avtomatik tarjima va sun’iy intellekt asosidagi rasm tahrirlash funksiyalarini ishga tushirdi. Bu haqda Tech Crunch nashri ma’lum qildi.
Avtomatik tarjima funksiyasi butun dunyo bo‘ylab ishga tushirilgan bo‘lib, foydalanuvchilar tarjima qilingan postdagi tishli belgi orqali ma’lum til uchun avtomatik tarjimani o‘chirib qo‘yishlari mumkin.
Shu bilan birga, X foydalanuvchilarga tabiiy til so‘rovi orqali rasmni tahrirlash imkonini beruvchi yangi foto muharrirni ham taqdim etdi. Masalan, foydalanuvchi «bu fotosuratni muzeydagi rasm kabi ko‘rsat» deb so‘rasa, Grok modeli ushbu tasvirni yaratadi.
Yangi rasm muharririda chizish va matn vositalari, shuningdek, yuzlar yoki maxfiy ma’lumotlarni yashirish imkonini beruvchi blur funksiyasi mavjud. Kompaniya ushbu yangilanishlarni yaqin orada Android ilovasiga ham joriy qilishni rejalashtirmoqda.
Ilgari, SI yordamida tasvirlarni tahrirlash funksiyasi foydalanuvchilarga boshqa odamlarning tasvirlarini ularning roziligisiz o‘zgartirish imkoniyatini bergani uchun tanqid qilingan edi. Hozircha X yangi SI asosidagi rasm tahrirlash funksiyasining pullik hisoblarga berilishi aniq emas.
Eslatib o‘tamiz, avvalroq Ilon Mask X platformasida X Money moliyaviy xizmatini taqdim etgan edi.
