2027-yilgi Chevrolet Blazer EV modelida tashqi ranglar bo‘yicha kichik, ammo sezilarli o‘zgarishlar kiritildi. Bu haqda GM Authority xabar berdi.
Asosiy o‘zgarishlardan biri Galaxy Gray Metallic rangi bekor qilinadi. Uning o‘rniga White Sands deb nomlangan ochroq va issiqroq rang joriy etiladi. Bu yangi rang LT va RS versiyalarida mavjud bo‘ladi, ammo eng yuqori SS versiyasida taklif etilmaydi.
Shuningdek, tom ranglari bo‘yicha ham o‘zgarish bor. Avval mavjud bo‘lgan Summit White tom varianti olib tashlandi. Endi asosiy kontrast variant sifatida qora rangli tom qoladi. U LT uchun qo‘shimcha opsiya, RS va SS uchun esa standart hisoblanadi.
RS versiyasi uchun esa qo‘shimcha ravishda tomni bir xil rangda qilish imkoniyati saqlanib qolgan. Bu holatda qora kontrast tom olib tashlanadi.
Umuman olganda, bu yangilanishlar dizaynni soddalashtirish va turli versiyalar o‘rtasidagi farqni aniqroq ko‘rsatishga qaratilgan.
Eslatib o‘tamiz, avvalroq Chevrolet Sonic 2027 avtomobilining ichki qismi namoyish etilgandi. Kompaniya ma’lumotiga ko‘ra, yangi model interyeri sport uslub va zamonaviy texnologiyalar uyg‘unligida yaratilgan. Salon besh kishiga mo‘ljallangan bo‘lib, bagaj hajmi taxminan 400 litrni tashkil etadi.
