2026-yilgi Chevrolet Tahoe turli yo‘l va ob-havo sharoitlariga moslashuvchi bir nechta haydash rejimlari bilan taqdim etiladi. Bu haqda GM Authority ma’lumot berdi.
Ushbu tizim dvigatel javobi, uzatmalar qutisi, rul boshqaruvi, osma va tortish nazorati kabi funksiyalarni avtomatik o‘zgartiradi.
Normal rejimi kundalik foydalanish uchun mo‘ljallangan. U shahar va trassa uchun qulay boshqaruv, yumshoq yurish va yonilg‘i tejamkorligini ta’minlaydi.
Sport rejimi avtomobilni yanada tezkor qiladi. Bu holatda uzatmalar qutisi agressivroq ishlaydi va rul boshqaruvi aniqroq bo‘ladi.
Snow/Ice rejimi qor va muzli yo‘llar uchun ishlab chiqilgan. Tizim g‘ildiraklarning sirpanishini kamaytirish uchun gaz pedalining sezgirligini pasaytiradi.
Off-Road rejimi tuproq, shag‘al va notekis yo‘llarda harakatlanishga moslashtirilgan. Bu rejim avtomobilning balandligi, tortish tizimi va gaz javobini o‘zgartiradi.
Tow/Haul rejimi og‘ir yuk yoki tirkama tortishda yordam beradi. Tizim uzatmalar qutisi va stabilizatsiya funksiyalarini yuk uchun moslashtiradi. Dizel versiyalarda qo‘shimcha dvigatel tormozi ham ishga tushadi.
Terrain rejimi esa qiyin yo‘llar va past tezlikdagi off-road holatlari uchun mo‘ljallangan. U past uzatmalarni uzoqroq ushlab turadi va differensial hamda osma tizimini moslashtiradi.
Shuningdek, Terrain rejimida L1, L2 va Drive kabi qo‘shimcha sozlamalar mavjud. Ular turli darajadagi notekis yo‘llar va tog‘li hududlarda avtomobilni yanada qulay boshqarishga yordam beradi.
Eslatib o‘tamiz, avvalroq Chevrolet kuchli V8 dvigatelini namoyish qilishi kutilayotgani haqida xabar berilgandi. Chevrolet Performance kompaniyasi ijtimoiy tarmoqlarda yangi dvigatelga oid tizer suratni e’lon qildi. Postga katta yangi narsa kelayotgani haqida izoh yozilgan.
