Misr terma jamoasi JCh – 2026 guruh bosqichida Yangi Zelandiyani 3:1 hisobida mag‘lub etib, jahon chempionatlari tarixidagi ilk g‘alabasiga erishdi. Vankuverdagi BC Place stadionida bo‘lib o‘tgan uchrashuvda misrliklar hisobda ortda qolganiga qaramay, ikkinchi bo‘limda o‘yinni o‘z foydasiga burib yubordi.
Yangi Zelandiya uchrashuvni ancha faol boshladi. Sarprit Singx va Elayja Jast dastlabki daqiqalardanoq Misr darvozasi oldida xavfli vaziyatlar yaratdi. 15-daqiqada esa Finn Surman burchak zarbasidan so‘ng kuchli bosh bilan zarba berib, Yangi Zelandiyani hisobda oldinga olib chiqdi.
Birinchi bo‘lim davomida Misr ham javob qaytarishga urindi. Muhammad Saloh va Imom Ashur tanaffusgacha gol urishga yaqin keldi, biroq Yangi Zelandiya darvozaboni Maks Krokomb jamoasini qutqarib qoldi. Ikkinchi bo‘lim boshida ham Salohda hisobni tenglashtirish imkoniyati bo‘ldi, ammo uning zarbasiga yana darvozabon to‘sqinlik qildi.
Yangi Zelandiya birozdan so‘ng farqni oshirishi mumkin edi. Kallum Makkovattning bosh bilan yo‘llagan zarbasidan keyin Misr darvozaboni Mustafo Shobeyr ajoyib seyv amalga oshirib, jamoasini o‘yinda saqlab qoldi. Bu epizoddan keyin Misr hujumdagi bosimini kuchaytirdi.
58-daqiqada Mustafo Ziko bosh bilan aniq zarba berib, hisobni tenglashtirdi. Oradan to‘qqiz daqiqa o‘tib, Muhammad Saloh chiroyli jamoaviy hujumdan so‘ng pastki burchakka aniq zarba yo‘lladi va Misrni oldinga olib chiqdi. Ushbu gol misrlik futbolchilar va muxlislar uchun tarixiy lahzaga aylandi.
Hal qiluvchi gol
82-daqiqada Trezige uchinchi golni urib, uchrashuv taqdirini hal qildi. Shu tariqa Misr 3:1 hisobida g‘alaba qozonib, jahon chempionatidagi uzoq kutilgan ilk zafarini nishonladi. Terma jamoa mundialdagi debyutidan 92 yil 25 kun o‘tib birinchi g‘alabasiga erishdi.
Uchrashuvning eng yaxshi futbolchisi deb Muhammad Saloh topildi. Misr sardori o‘yindan keyin bu natijani futbolchilar va murabbiylar shtabi uchun ulkan yutuq deb atadi. Uning aytishicha, jamoa bu g‘alabadan zavq olishi, keyin esa navbatdagi uchrashuvga e’tibor qaratishi kerak.
Yangi Zelandiya bosh murabbiyi Darren Beyzli esa mag‘lubiyatdan afsusda ekanini bildirdi. Uning so‘zlariga ko‘ra, jamoa birinchi bo‘limda juda yaxshi o‘ynagan, to‘p nazorat qilgan va ko‘plab vaziyatlar yaratgan. Biroq ikkinchi bo‘limda Misr o‘yin sur’atini oshirgan va Yangi Zelandiya bunga munosib javob qaytara olmagan.
Ushbu g‘alabadan keyin Misr «G» guruhida 4 ochko bilan peshqadamlikka chiqdi. Eron va Belgiya hisobida 2 ochkodan bor, Yangi Zelandiya esa 1 ochko bilan guruhda so‘nggi o‘rinda qolmoqda. Misr uchun bu natija nafaqat turnir jadvali, balki milliy futbol tarixi nuqtayi nazaridan ham katta ahamiyatga ega bo‘ldi.
Avvalroq «Kursiv» nashri Urugvay autsayderga qarshi o‘yinda g‘alabani qo‘ldan boy bergani haqida yozgan edi.
