Chevrolet Braziliyada faoliyatining 100 yilligi munosabati bilan Chevrolet Tracker krossoverining maxsus yubiley versiyasini taqdim etdi. Bu haqda kompaniya saytida ma’lum qilindi.
Tracker’ning 100 yillik maxsus versiyasi Chevrolet’ning Braziliyadagi uzoq yillik tarixiga bag‘ishlangan. Kompaniya ushbu modelni eksklyuziv va cheklangan nashr sifatida joylashtirmoqda. Avtomobil zamonaviy dizayn, qulaylik, texnologiyalar va yubileyga xos tashqi elementlar bilan ajralib turadi.
Maxsus versiya Chevrolet’ning 100 yillik logotipi bilan bezatilgan. Model uchun Azul Noronha deb nomlangan eksklyuziv ko‘k rang taklif etiladi. Shuningdek, avtomobil 17 dyuymli yengil qotishmali disklar, integratsiyalashgan ekranlar va premium qoplamali o‘rindiqlar bilan jihozlangan.
Yana qanday imkoniyatlari bor
Chevrolet’ning ta’kidlashicha, Tracker’ning yubiley nashri erkinlik, uslub va nafislikni ifodalaydi. SUV xavfsizlik, texnologiya hamda yorqin dizaynni birlashtirgan holda, faol hayot tarziga ega haydovchilar uchun mo‘ljallangan.
Kompaniya Tracker oilasining boshqa versiyalarini ham alohida qayd etdi. RS versiyasi sport uslubi bilan, Premier esa yuqori darajadagi jihozlanishi va qulayligi bilan ajralib turadi. LTZ hamda LT modifikatsiyalari esa kundalik foydalanish, texnologiya va qulaylikni qadrlaydigan xaridorlar uchun taklif etiladi.
Eslatib o‘tamiz, Kursiv Uzbekistan nashri yangi Chevrolet Tracker 2027 avtomobilining narxlari e’lon qilingani haqida yozgan edi.
