Chevrolet Tracker avtomobili O‘zbekistonda eng ommabop modellardan biri hisoblanadi. Yanvar – may oylarida ushbu modeldan 16,9 ming dona xarid qilingan. «Kursiv» avtomobil haqida eng qiziqarli ma’lumotlarni bitta materialga jamladi.
Bir nom ostida uch xil avtomobil
Tracker tarixidagi eng kam eslanadigan jihatlardan biri shundaki, uning dastlabki talqini bugungi shahar krossoveriga umuman o‘xshamagan. Ilk Tracker arzon, yengil va boshqarish zavqini beradigan ixcham yo‘ltanlamas sifatida yaratilgan edi.
J.D. Power ma’lumotlariga ko‘ra, avtomobil 1998-yilgacha Geo brendi ostida sotilgan, keyinchalik esa Chevrolet Tracker nomi bilan ishlab chiqarish davom ettirilgan. Model ikki eshikli yumshoq tomli hamda to‘rt eshikli qattiq tomli kuzovlarda taklif etilgan. Shu bois u o‘z davrining kam sonli ochiq tomli yo‘ltanlamaslaridan biri hisoblanadi.
Yana bir muhim jihat shundaki, 2019-yildan ishlab chiqarila boshlagan zamonaviy Tracker eski Amerika modelining bevosita davomchisi emas. Yangi avlod avtomobili Xitoy va rivojlanayotgan bozorlar uchun yaratilgan GEM platformasiga asoslangan.
Braziliya matbuot materiallarida 2020-yildan keyingi model mahalliy Tracker liniyasining uchinchi avlodi sifatida tilga olinadi. Bu esa avtomobilning global tarixi bilan ayrim bozorlardagi marketing tasnifi har doim ham bir-biriga mos kelmasligini ko‘rsatadi.
Tracker bilan bog‘liq yana bir qiziq paradoks AQSh bozorida kuzatiladi. Chevrolet ushbu mamlakatda Tracker emas, Trax modelini sotadi. 2026-yilgi Chevrolet Trax 1,2 litrli turbo dvigatel, 137 ot kuchi va faqat old g‘ildirakdan tortish tizimi bilan taklif etiladi. Shu sabab Tracker nomi bugungi kunda asosan Xitoy, Lotin Amerikasi va MDH bozorlarida yashab kelmoqda.
Texnika va dizayndagi ajablanarli farqlar
Tracker’ning eng qiziqarli texnik jihatlaridan biri shundaki, bir xil kuzov sinfiga mansub model turli bozorlarda mutlaqo boshqa xarakterga ega. Xitoy bozoriga mo‘ljallangan 2019-yilgi versiyada 1,0 litrli 92 kVt hamda 1,341 kub santimetrli 121 kVt quvvatga ega dvigatellar taklif qilingan.
Avtomobil 40 litrli yonilg‘i baki, 390 litrli yukxona, variator yoki olti bosqichli transmissiya bilan jihozlangan. 2022-yilda taqdim etilgan Tracker RS esa 1,5 litrli turbo Ecotec dvigateli bilan ancha sport ruhiga ega bo‘ldi.
To‘rt silindrli motor 135 kVt quvvat va 250 Nm aylantiruvchi moment ishlab chiqarib, avtomobilning 100 km/soat tezlikka 7,8 soniyada chiqishini ta’minlagan. O‘rtacha yonilg‘i sarfi esa 100 kilometrga 6,35 litrni tashkil etgan.
Lotin Amerikasi uchun ishlab chiqarilgan Tracker versiyalarida asosiy urg‘u quvvat, qulaylik va tejamkorlik o‘rtasidagi muvozanatga qaratilgan. Argentina bozori uchun tayyorlangan 2026-yilgi texnik ma’lumotlarda 1,2 litrli turbo dvigatel, 132 ot kuchi, 190 Nm aylantiruvchi moment va olti bosqichli avtomatik transmissiya qayd etilgan.
Modelning yukxonasi 393 litr bo‘lib, orqa o‘rindiqlar yig‘ilganda uning hajmi 1294 litrgacha kengayadi. Avtomobil 2570 millimetrli g‘ildirak bazasiga ega hamda RS va Premier jihozlanish darajalarida taklif qilinadi.
Rekordlar va mukofotlar
Tracker’ning rekord va mukofotlar tarixi ko‘pchilik tasavvur qilganidan ancha boy. Model 2021-yilda Inmetro reytingida o‘z toifasidagi eng tejamkor SUVlardan biri sifatida e’tirof etilgan. 2022-yilda esa Latin NCAP sinovlarida besh yulduzli xavfsizlik bahosini qo‘lga kiritgan.
2026-yilda Braziliyaning Quatro Rodas nashri o‘tkazgan «Menor Custo de Uso» tadqiqotida Tracker ixcham SUVlar orasida ikkinchi o‘rinni egalladi. Bu natijalar model nafaqat savdo ko‘rsatkichlari, balki xavfsizlik, yonilg‘i tejamkorligi va egalik xarajatlari bo‘yicha ham puxta ishlab chiqilganini ko‘rsatadi.
Ishlab chiqarish va brend strategiyasi
Tracker General Motors uchun shunchaki navbatdagi model emas, balki turli bozorlardagi strategik maqsadlarga xizmat qilgan muhim mahsulotga aylandi. Xitoyda u 2019-yilda Chevrolet’ning yangilanayotgan SUV qatori tarkibida taqdim etildi.
Biroq 2025-yilda GM’ning mamlakatdagi faoliyatini qayta tashkil etishi va Shenyang zavodining yopilishi fonida Tracker ishlab chiqarilishi to‘xtatildi. Reuters ma’lumotlariga ko‘ra, kompaniya Xitoy bozorida asosiy e’tiborni Cadillac, Buick va premium import yo‘nalishlariga qaratishga qaror qilgan.
Braziliyada esa butunlay boshqa manzara kuzatildi. Tracker Chevrolet’ning mintaqadagi asosiy modellaridan biriga aylandi. Chevrolet Brasil ma’lumotlariga ko‘ra, 2022-yilda mamlakatda 70,8 ming dona Tracker ro‘yxatdan o‘tkazilib, model tarixidagi rekord natija qayd etilgan.
Shu davrda mahalliy ishlab chiqarish hajmi 250 ming donalik marradan oshgan. Kompaniya, shuningdek, 2025-yilgi yangilanishdan so‘ng Tracker Janubiy Amerikada eng ko‘p ro‘yxatdan o‘tkazilgan SUVga aylanganini bildirgan.
Avvalroq «Kursiv» Chevrolet Spark elektromobili rasman sotuvga chiqqani haqida yozgan edi.
