Yangi Chevrolet Damas 3 nomi bilan tanilgan yangi Chevrolet Damas Move va Damas Max avtomobillari olti xil komplektatsiyada sotilmoqda. 110 km nashri modelning texnik imkoniyatlari va ustunliklarini e’tirof etdi.
Nashrning yozishicha, Avtomobilning rasmiy nomi Chevrolet Damas Move & Max bo‘lsa-da, UzAuto Savdo platformasida u Damas 3 sifatida ko‘rsatilgan. Model Xitoyning Wuling Hongguang V mikroveni asosida yaratilgan. Yangi Damas avvalgi avloddan kattaroq kuzovi, kuchliroq dvigateli, kengaytirilgan yukxonasi va zamonaviy xavfsizlik tizimlari bilan farq qiladi.
Yuk va yo‘lovchi versiyalari taklif etiladi
Damas Max asosan yuk tashishga mo‘ljallangan ikki o‘rinli furgon hisoblanadi. Uning 1,2 litrli dvigatelga ega boshlang‘ich VAN 1.2 LV0 versiyasi 134 mln 439 ming so‘mga baholangan. 1,5 litrli VAN 1.5 LV0 komplektatsiyasi esa 142 mln 471 ming so‘m turadi.
Yo‘lovchi tashishga mo‘ljallangan Damas Move yetti yoki sakkiz o‘rinli salon bilan taklif qilinadi. PAS 1.2 LV0 versiyasining narxi 139 mln 675 ming so‘mdan boshlanadi. PAS 1.2 LV1 komplektatsiyasi 144 mln 563 ming so‘m, 1,5 litrli PAS 1.5 LV0 versiyasi 149 mln 11 ming so‘m, eng yuqori PAS 1.5 LV1 komplektatsiyasi esa 154 mln 128 ming so‘mga baholangan.
Dvigatellar quvvati 103 ot kuchigacha yetadi
Xaridorlar ikkita atmosfera dvigatelidan birini tanlashi mumkin. 1,2 litrli motor 81 ot kuchiga ega bo‘lib, besh pog‘onali mexanik uzatmalar qutisi bilan ishlaydi. 1,5 litrli dvigatelning quvvati 103 ot kuchini tashkil etadi va u olti pog‘onali mexanik transmissiya bilan birlashtirilgan.
UzAuto Motors ma’lumotiga ko‘ra, yangi modelning uzunligi 4 425 millimetrga, kengligi 1 670 millimetrga, g‘ildirak bazasi esa 2 850 millimetrga yetgan. Damas Max 650 kilogrammgacha yuk ko‘tara oladi, uning yuk bo‘limi hajmi 3 050 litrni tashkil etadi. Yo‘lovchi versiyasida uchinchi qator o‘rindiqlaridan keyin 496 litrli bagaj bo‘limi mavjud.
Yana nimalar ma’lum
Jihozlar komplektatsiyaga qarab farqlanadi. Modelga ABS, EBD va ESC tizimlari, xavfsizlik yostiqchalari, ISOFIX mahkamlagichlari, konditsioner, elektr oynalar, markaziy qulf, immobilayzer hamda USB va Bluetooth’ni qo‘llab-quvvatlovchi audiotizim o‘rnatiladi. Ayrim versiyalarda ikkinchi qator uchun alohida «kapitan» o‘rindiqlari va old-orqa qismlar uchun ikki zonali konditsioner ham mavjud.
Avtomobillar UzAuto Motors’ning Xorazm viloyati Pitnak shahridagi zavodi bilan bog‘liq ishlab chiqarish tizimi doirasida chiqarilmoqda. Mazkur korxona Damas va Labo avtomobillarini ishlab chiqarishga ixtisoslashgan bo‘lib, uning yillik quvvati 150 mingta avtomobilga yetadi.
Nashr modelning narxi, tanlov imkoniyatlari va texnik xususiyatlarini tanlash uchun yetarli sabab sifatida ko‘rsatmoqda.
Avvalroq «Kursiv» Damas, Labo va boshqa yuk tashishga mo‘ljallangan modellar narxini o‘rgangan edi.
