Chevrolet’ning yangi avlod sport avtomobili 2029-yilgi model sifatida taqdim etilishi kutilmoqda. GM Authority ma’lumotiga ko‘ra, model ichki yonuv dvigateli, orqa g‘ildirakdan tortish tizimi va mexanik uzatma varianti bilan chiqishi mumkin.
Avval 2028-yilda chiqishi kutilgan edi
Yangi avlod model avval 2028-yilgi model sifatida chiqarilishi taxmin qilingan edi. Endi esa uning 2029-yilgi model sifatida bozorga chiqishi kutilmoqda.
Shunga qaramay, loyiha bo‘yicha asosiy rejalar o‘zgarmagan. Avtomobil an’anaviy ichki yonuv dvigateli va sport xarakterini saqlab qolishi aytilmoqda.
Yangi Chevrolet avvalgi ikki eshikli kupe shaklidan farqli ravishda to‘rt eshikli kuzovda ishlab chiqilishi mumkin.
Manbalarga ko‘ra, uning o‘lchamlari Chevrolet Malibu yoki Chevrolet SS’ga yaqin bo‘lishi ehtimol qilinmoqda.
Mexanik uzatma varianti saqlanadi
Avtomobil ixlosmandlari uchun muhim jihatlardan biri mexanik uzatma qutisi varianti bo‘ladi.
Shuningdek, modelda bir nechta transmissiya varianti taklif etilishi kutilmoqda. Bu Chevrolet’ning sport xarakterga ega modelida haydovchilik hissini saqlab qolishiga ishora qiladi.
Kuchliroq versiya ham rejalashtirilgan
Chevrolet yangi model uchun alohida yuqori unumdorlikka ega versiyani ham tayyorlamoqda.
Hozircha uning texnik ko‘rsatkichlari rasman ochiqlanmagan. Biroq manbalarga ko‘ra, GM’ning yangi avlod Small Block V8 dvigateli bunday model uchun mos variant bo‘lishi mumkin.
Ishlab chiqarish Michigan zavodida yo‘lga qo‘yilishi mumkin
Yangi avlod avtomobil GM Alpha 2 orqa g‘ildirakdan tortish platformasining yangilangan versiyasida ishlab chiqarilishi kutilmoqda.
Ishlab chiqarish AQShning Michigan shtatidagi GM Lansing Grand River Assembly zavodida yo‘lga qo‘yilishi mumkin. Avvalgi avlod sport modeli ham aynan shu zavodda yig‘ilgan.
Eslatib o‘tamiz, avvalroq Chevrolet’ning etanolda yuradigan Onix Eco modeliga talab oshgani haqida xabar berilgandi. General Motors vakiliga ko‘ra, model ayniqsa dekarbonizatsiya maqsadlariga e’tibor qaratayotgan kompaniyalar orasida qiziqish uyg‘otgan.
