Giztop platformasida Redmi K100 Pro Max smartfoni xalqaro yetkazib berish imkoniyati bilan sotuvga chiqarildi. Bu haqda Gizmochina nashri xabar bermoqda.
Qurilma Snapdragon 8 Elite Gen 5 protsessori, 185 Gts yangilanish chastotasiga ega OLED ekran va 9070 mA/soat sig‘imli batareya bilan jihozlangan. Gizmochina ma’lumotiga ko‘ra, smartfonning boshlang‘ich narxi $799 ni tashkil etadi.
Model 6,9 dyuymli 1.5K+ OLED displeyga ega bo‘lib, uning maksimal yorqinligi 4500 nitgacha yetadi. Ekran P3 ranglar diapazoni va DC Dimming texnologiyasini qo‘llab-quvvatlaydi. Shuningdek, qurilmada tasvir bilan ishlash uchun alohida Xiaomi D2 chipi o‘rnatilgan.
Texnik imkoniyatlar
Smartfon Qualcomm Snapdragon 8 Elite Gen 5 platformasida ishlaydi. U 16 GB gacha LPDDR5X Ultra tezkor xotira hamda 256 GB, 512 GB yoki 1 TB UFS 4.1 ichki xotira bilan taklif qilinadi. Qurilmaga Xiaomi HyperOS operatsion tizimi o‘rnatilgan.
Redmi K100 Pro Max’ning asosiy kamerasi optik tasvir barqarorlashtirish tizimiga ega 200 MP sensordan iborat. Bundan tashqari, 5 karra optik zumli 50 MP periskop telekamera va 102 darajali ko‘rish burchagiga ega 50 MP ultra keng burchakli kamera mavjud. Smartfon 8K formatida soniyasiga 30 kadr tezlikda video yozishi mumkin. Old kamera esa 32 MP aniqlikka ega.
Qurilmaning 9070 mA/soat sig‘imli batareyasi 100 Vt simli va 50 Vt simsiz tezkor quvvatlashni qo‘llab-quvvatlaydi. Shuningdek, 22,5 Vt quvvatli teskari simli quvvatlash funksiyasi orqali boshqa qurilmalarni quvvatlantirish mumkin.
Redmi K100 Pro Max Giztop platformasida global yetkazib berish bilan taklif qilinmoqda. Narx tanlangan xotira konfiguratsiyasiga qarab o‘zgaradi, bazaviy versiya esa $799 dan boshlanadi.
Eslatib o‘tamiz, Kursiv Uzbekistan nashri Redmi K100 flagman smartfonlarini taqdim etgani haqida yozgan edi.
