O‘zbek boksi afsonasi, jahon chempioni va Monreal-1976 Olimpiadasi kumush medali sohibi Rufat Risqiyev 76 yoshida vafot etdi. Bu haqda 15-avgust kuni O‘zbekiston Milliy olimpiya qo‘mitasi xabar berdi.
O‘zbek boksining ilk jahon chempioni
«Toshkent yo‘lbarsi» nomi bilan tanilgan Rufat Risqiyev 1949-yil 2-oktabrda tug‘ilgan. U o‘zbek boksining xalqaro maydondagi dastlabki yirik muvaffaqiyatlariga asos solgan sportchilardan biri hisoblanadi.
Risqiyev 1974-yilda Kubaning Havana shahrida o‘tkazilgan tarixdagi ilk boks bo‘yicha jahon chempionatida 75 kg gacha vazn toifasida oltin medalni qo‘lga kiritdi. Shu tariqa u jahon chempioni bo‘lgan birinchi o‘zbek bokschisiga aylandi.
Ikki yil o‘tib, Monrealda bo‘lib o‘tgan 1976-yilgi yozgi Olimpiya o‘yinlarida Risqiyev kumush medalga sazovor bo‘ldi.
Sportchining o‘zbek boksiga qo‘shgan hissasi davlat tomonidan ham e’tirof etilgan. U 2020-yilda «Do‘stlik» ordeni bilan taqdirlangan.
Avvalroq Kursiv Uzbekistan O‘zbekiston terma jamoasi va «Manchester Siti» himoyachisi Abduqodir Husanovning bobosi Husan Hoshimov vafot etgani haqida xabar bergan edi. Husan Hoshimov «Bunyodkor» U-19 jamoasi bosh murabbiyi Hikmat Hoshimovning otasi bo‘lgan.
