Jorjina Rodrigesning shaxsiy hayoti Krishtianu Ronaldu bilan chambarchas bog‘langan. Biroq ular 2016-yilda tanishguniga qadar Jorjinaning kimlar bilan munosabatda bo‘lgani haqida Ispaniya OAVlarida turli yillarda bir qator ma’lumotlar paydo bo‘lgan.
Xavi — Jorjinaning o‘smirlik davridagi eng yaqin insonlardan biri
Jorjina Ispaniyaning Ueska provinsiyasidagi Xaka shahrida ulg‘aygan. Keyinchalik «La isla de las tentaciones» teleloyihasida ishtirok etgan Xavi ham shu yerda yashagan va Jorjina bilan maktab davridan tanish bo‘lgan.
2021-yilda Ispaniya matbuotida ularning o‘smirlik paytida sevgi munosabatida bo‘lgani haqida xabarlar tarqaldi. «Semana» nashri eski suratlarni e’lon qilgach, bir qator OAVlar Xavini Jorjinaning ilk sevgisi sifatida taqdim etdi.
Ammo bu voqeada muhim bir tafsilot bor. Xavining o‘zi keyinchalik Telecinco’ga bergan izohida ular sevgili bo‘lganini rad etgan. Uning so‘zlariga ko‘ra, ikkalasi 13 yoshdan 18 yoshgacha juda yaqin do‘st bo‘lgan, bir davrada yurgan va ko‘p vaqtni birga o‘tkazgan, biroq rasmiy juftlik bo‘lmagan.
Xavi Jorjina haqida iliq fikrlar bildirgan. Ularning maktabdan keyin yaqin atrofdagi bog‘da o‘tirib, kelajakda dunyo bo‘ylab sayohat qilish va katta maqsadlarga erishish haqida gaplashganini eslagan. Jorjina Madridga ketgach, ularning aloqasi asta-sekin uzilgan.
Shu sababli Xavini Jorjinaning «aniq sobiq sevgilisi» deb ko‘rsatish ehtiyotkorlikni talab qiladi: ayrim nashrlar romantik munosabat bo‘lganini yozgan, lekin Xavining o‘zi buni rad etgan.
Alberto Santana bilan munosabat haqidagi xabar qayerdan chiqqan
Jorjina bilan bog‘langan yana bir ism — Alberto Santana. U Ispaniyada «Mujeres y Hombres y Viceversa» ko‘rsatuvidagi ishtiroki orqali tanilgan, keyinchalik boshqa realiti-shoularda ham qatnashgan.
Bu haqdagi ma’lumot 2022-yil dekabrida Telecinco’ning «Fiesta» dasturida paydo bo‘lgan. Dastur ishtirokchisi Amor Romeyra Jorjina Ronaldu bilan tanishishidan oldin Santana bilan romantik munosabatda bo‘lganini aytgan. Keyinchalik AS, La Vanguardia va boshqa Ispaniya nashrlari ushbu da’voni yoritdi.
Biroq bu yerda ham muhim farq mavjud: ma’lumot Jorjina yoki Santananing o‘zidan chiqmagan. La Vanguardia alohida qayd etishicha, taxmin qilingan munosabatni na Rodriges, na Santana rasman tasdiqlagan.
Migel Anxel Silvestre bilan nima bo‘lgan
Eng qiziqarli hikoyalardan biri ispan aktyori Migel Anxel Silvestre bilan bog‘liq. «Velvet» va «Sense8» seriallari orqali mashhur bo‘lgan aktyor 2016-yilda Jorjina bilan Madridda birga tushlik qilayotgan paytda suratga olingan.
Europa Press o‘sha davrdagi fotosuratlarda ularning bir-biri bilan erkin va samimiy suhbatlashib o‘tirganini qayd etgan. Bu suratlar Jorjina hali ommaga deyarli noma’lum bo‘lgan paytda olingan. Keyinchalik uning Krishtianu Ronaldu bilan munosabati oshkor bo‘lgach, suratdagi qiz aynan Jorjina Rodriges ekani kengroq muhokama qilina boshladi.
Shundan so‘ng ayrim nashrlar Jorjina va Silvestreni romantik jihatdan bog‘ladi. Ammo ularning sevgili bo‘lganini tasdiqlaydigan ishonchli bayonot yo‘q.
La Vanguardia ham bu masalada ehtiyotkor: nashr ularning munosabati hech qachon rasman tasdiqlanmaganini yozadi. Silvestre esa keyinchalik Jorjinani yaxshi do‘sti sifatida ta’riflagan.
Avvalroq Kursiv Uzbekistan nashri Jorjina Rodriges va Krishtianu Ronaldu qanday tanishgani haqida yozgan edi.
