21-dekabr kuni Saudiya Arabistoni poytaxti Ar-Riyod shahrida superogʻir vazn toifasida sobiq jahon chempioni britaniyalik Tayson Fyuri va ushbu vaznda WBC, WBA va WBO kamarlarining amaldagi sohibi ukrainalik Aleksandr Usik oʻrtasida boʻlib oʻtadigan revansh jangining gonorar miqdori ma’lum qilindi.
Ma’lumotlarga koʻra, jangning umumiy mukofot jamgʻarmasi $190 millionni tashkil qiladi. Ukrainalik jahon chempioni ushbu summaning 60 foiziga, britaniyalik esa 40 foiziga ega chiqadi, ya’ni Usik $114 mln, Fyuri esa $76 mln.ni qoʻlga kiritadi.
Eslatib oʻtamiz, ushbu bokschilar oʻrtasidagi birinchi jang joriy yilning may oyida boʻlib oʻtgan. Unda Usik ochkolar boʻyicha Fyuri ustidan gʻalaba qozongan edi.
Avvalroq Kursiv Uzbekistan Bahodir Jalolovning professional boksdagi navbatdagi raqibi ma’lum boʻlgani haqida xabar bergan edi.
