Samsung nihoyat Google tomonidan 2016-yilda Android 7.1 platformasida joriy etilgan uzluksiz yangilanish (Seamless Updates yoki A/B Updates) funksiyasini o‘z flagman qurilmalariga kiritmoqda. Ushbu xususiyat 8-yil davomida One UI tizimida mavjud bo‘lmagan, ammo endilikda Galaxy S25 seriyasida paydo bo‘ldi. Bu haqda Wccftech.com ma’lum qildi
Uzluksiz yangilanish funksiyasi Android tizimini fon rejimida yangilash imkonini beradi, ya’ni foydalanuvchilar operatsion tizim yangilanishlarini amalga oshirishda smartfondan foydalanishni davom ettirishlari mumkin. Faqat yangilash tugallangandan so‘ng qurilmani qayta ishga tushirish kifoya.
Garchi ushbu texnologiya o‘tgan yili Galaxy A55 kabi ayrim o‘rta toifadagi qurilmalarda paydo bo‘lgan bo‘lsa-da, Samsung uni faqat endi o‘zining flagman modellari, Galaxy S25 seriyasida kengroq foydalanishga qaror qildi. Bu esa mazkur funksiyaning keyingi avloddagi barcha yangi Samsung qurilmalarida paydo bo‘lish ehtimolini kuchaytiradi.
Avvalroq Kursiv Uzbekistan Samsung Galaxy S25 Ultra kamerasi suratga olish imkoniyatlarini namoyish etgani haqida xabar bergan edi.
