Bugungi kunda Chevrolet Damas avtomobilining birlamchi bozordagi narxi 93 million so‘mdan boshlanadi. 2025-yilning yanvar – mart oylarida O‘zbekistonda 22,4 ming dona yangi Damas ishlab chiqarilgan, bu o‘tgan yilning shu davriga nisbatan 18 foizga ko‘pdir. Ikkilamchi bozorda sotilgan avtomobillarning aniq soni haqida ma’lumot yo‘q.
Kursiv Uzbekistan nashri Chevrolet Damas modelining narxlari va ikkilamchi bozorda avtomobil sotib olayotganda nimalarga ahamiyat berish lozimligi haqida material tayyorladi.
Motor va texnik holat
- Dvigatel ovozini eshiting – shovqin, g‘alati taqillash bo‘lmasligi kerak;
- Yog‘ oqishlari yo‘qligiga qarang – motor va transmissiya atrofi quruq bo‘lishi lozim;
- Kompyuter diagnostikasi qildirgan ma’qul – yashirin nosozliklarni aniqlaydi;
- Sovuqlikda ishga tushirilishi – bir urinishda oson yurishi kerak.
Kuzov va tashqi ko‘rinish
- Zang tekshiruvini unutmang – ayniqsa, eshiklar pastki qismi va g‘ildirak arkalarida;
- Avtomobil bo‘yalganmi yoki yo‘qmi – har xil tonda bo‘yalgan joylar bo‘lsa, avariya bo‘lgan bo‘lishi mumkin;
- Shassi raqamlari tekshirilishi zarur (PTS va kuzovdagi raqamlar bir xil bo‘lishi kerak).
Salon va qulayliklar
- Pechka va sovitish tizimi ishlayaptimi, ayniqsa, yoz va qishda muhim;
- O‘rindiqlar, oynalar, eshiklar – mexanik qismlar silliq ishlashi lozim;
- Yoritish tizimi, signal va boshqa mayda elektr qismlar tekshiriladi.
Hujjatlar
- Texpasport va STIR egasiga to‘g‘ri kelishini tekshiring;
- Jarima yoki garovda emasmi – GAI bazasida tekshirish mumkin;
- Texnik ko‘rikdan o‘tganini tekshirish;
- Narx va bozor qiymati;
- Xuddi shunday yil va komplektatsiyadagi Damas narxlarini ko‘rib chiqing.
Yana bir muhim jihati shundaki, siz avtomobil xarid qilayotganingizda, eng avvalo, sotib olishdan qanday manfaat ko‘rishingizni belgilang.
Agar yengil sayohat yoki kundalik turmushda foydalanish uchun sotib olayotgan bo‘lsangiz boshqa modellarni ham o‘ylab ko‘rishingiz mumkin. Kichik biznes yoki o‘rta vaznli (500 kg atrofida) yuklarni tashish uchun bu model ayni muddao.
Chevrolet Damas modellari
| Model nomi | Turi | Xususiyatlari | Labeli / Qo‘shimcha |
|---|---|---|---|
| Damas Van (D11) | Yuk tashuvchi | Faqat old o‘rindiqlar; orqa qismi to‘liq yuk uchun mo‘ljallangan. | Damas D11 Van |
| Damas Combi (D3) | Yo‘lovchi-yukli | Orqa o‘rindiqlar bilan, 7 kishigacha sig‘adi; oilaviy va umumiy foydalanish uchun. | Damas D3 Combi |
| Damas DLX / Style Plus | Komfort yo‘nalishi | Chexollar, zamonaviy audio tizim, old oynalar lifti va boshqalar bilan. | Damas Style / DLX |
| Damas Ambulance (D13) | Maxsus tibbiy | Tez yordam uchun moslashtirilgan; tibbiy uskuna, sirena va yoritgichlar bilan. | Damas D13 Ambulance |
| Labo (Pickup) | Ochik kuzovli yuk tashuvchi | 2 o‘rinli kabina; orqa qismi ochiq kuzov, yuk tashish uchun ideal. | Chevrolet Labo Pickup |
Damasning narxlari
| Model / Komplektatsiya | Narx (so‘m) | Izohlar |
|---|---|---|
| Damas D11 STYLE (Van) | 93 156 000 | Asosiy yuk tashuvchi model, 0.8 L dvigatel, 5 bosqichli mexanik uzatma. |
| Damas D3 STYLE (Combi) | 96 448 000 | Kombi versiya, orqa o‘rindiqlar bilan, 0.8 L dvigatel, 5 bosqichli mexanik uzatma. |
| Damas D2 DLX Style Plus | 96 932 000 | Eng to‘liq komplektatsiya, qo‘shimcha opsiyalar bilan. |
| Damas D13 (Ambulance) | 92 909 000 | Tibbiy xizmatlar uchun maxsus model. |
| Ikkilamchi bozor (OLX e’lonlari) | 76 853 000 – 104 407 380 | 2022-yildan boshlab ishlab chiqarilgan. |
Makroiqtisodiy va hududiy tadqiqotlar instituti ma’lumotlariga ko‘ra, Damas avtomobilining yanvar – mart oylaridagi narxi o‘rtacha foydalanilgani $134 ga ($8 000 dan $7 866 ga), kam foydalanilgani $61 ga ($8 061 dan $8 000 ga) arzonlashgan.
Eslatib o‘tamiz, Kursiv Uzbekistan nashri Chevrolet Onix qo‘shni respublikalarda qanday narxlarda sotilayotgani haqida yozgan edi.
