Shaxmat bo‘yicha Nomzodlar turnirining 12-turida peshqadam Javohir Sindorov dunyoning ikkinchi raqamli shaxmatchisi Hikaru Nakamura bilan durangga imzo chekdi.
O‘zaro partiyadan so‘ng Hikaru Nakamura hisobidagi ochkolar 5,5 tani tashkil qildi. Javohir Sindorov o‘yindan keyingi izohida hozirgi vaziyatda uzoq va og‘ir partiya o‘ynash uchun sabab ko‘rmaganini ta’kidladi.
«Agar u uzun partiya o‘ynashni xohlasa, bunga ham tayyor edim. Lekin u ham ishonchli yo‘llarni tanlashini kutgandim», – dedi o‘zbekistonlik grossmeyster.
Shuningdek, shaxmatchi oldingi kungi muhim o‘yindan so‘ng ancha charchaganini yashirmadi. Musobaqa yakuniga ikki tur qolgan bir paytda Sindorov ehtiyotkorlik strategiyasini tanlaganini qayd etdi.
«Endi oxirgi turlarda iloji boricha ishonchli o‘ynash kerak. Hozir majburan g‘alaba izlashning hojati yo‘q», – deya qo‘shimcha qildi u.
Bo‘sh vaqtini qanday o‘tkazishi haqidagi savolga Sindorov dam olishi va Counter-Strike o‘ynashini ma’lum qildi. Navbatdagi 13-tur bahslari 14-aprel kuni soat 17:45 da boshlanadi. Unda Sindorov niderlandiyalik Anish Giriga qarshi dona suradi.
Avvalroq Kursiv Uzbekistan Javohir Sindorov Fabiano Karuana bilan durang o‘ynagani haqida xabar bergan edi.
