Changan kompaniyasi yangi Changan CS75 Plus HEV krossoverini Xitoyda oldindan sotuvga chiqardi. Bu haqda CarNewsChina nashri xabar bermoqda.
Yangi avtomobil o‘rta toifadagi krossover bo‘lib, tashqi ko‘rinishida katta radiator panjarasi bilan ajralib turadi. Uning o‘lchamlari 4770 mm uzunlik, 1910 mm kenglik va 1695 mm balandlikni tashkil etadi. G‘ildirak bazasi esa 2800 mm. Salon besh o‘rindiqli bo‘lib, markaziy panelda uchta ekran joylashgan. Model dunyoda birinchi bo‘lib 500 barli to‘g‘ridan-to‘g‘ri yonilg‘i purkash tizimiga ega gibrid dvigatel bilan taqdim etildi.
CS75 Plus HEV yangi iDE-H platformasiga asoslangan. Unda 1,5 litrli turbo benzin dvigatel va 180 kVt quvvatga ega elektromotor ishlaydi. Ichki yonuv dvigateli 110 kVt quvvat ishlab chiqaradi. Tizim 1,7 kVt/soatli batareya bilan jihozlangan.
Modelning asosiy afzalligi yonilg‘i tejamkorligida namoyon bo‘ladi. Shahar sharoitida avtomobil 100 km ga 3,54 litr benzin sarflaydi. Aralash siklda esa bu ko‘rsatkich 4,67 litrni tashkil etadi.
Yangi modelni bron qilish uchun 99 yuan ($14) to‘lash kifoya. Oldindan buyurtma berganlar yakuniy narxdan chegirmaga ega bo‘ladi. Avtomobilning rasmiy taqdimoti 24-aprel kuni Pekin avtosalonida bo‘lib o‘tadi.
Eslatib o‘tamiz, Kursiv Uzbekistan nashri Changan Nevo Q06 avtomobili qanday imkoniyatlarga egaligi haqida yozgan edi.
