Kia Sonet avtomobili sotib olishga arziydimi: tafsilotlar

Kia Sonet avtomobili O‘zbekistonda Chevrolet avtomobillardan keyingi eng ommabop modellardan biri hisoblanadi. «O‘zavtosanoat» AJ ma’lumotiga ko‘ra, yanvar-mart oylarida 5,6 ming dona xarid qilingan. Kursiv Uzbekistan ushbu modelning texnik imkoniyatlari, afzalliklari va kamchiliklarini o‘rgandi.

Texnik imkoniyatlar

Kia Sonet O‘zbekiston bozorida bir xil dvigatel bilan taklif etiladi. Bu 1.5 litrli MPI atmosfer motor bo‘lib, 115 ot kuchi va 144 N·m moment beradi. Hajmi 1497 sm³. Uzatmalar qutisi komplektatsiyaga qarab farq qiladi. Classic versiyada 6 pog‘onali mexanik quti bor. Qolgan asosiy versiyalar esa CVT avtomat bilan jihozlangan.

Dinamik ko‘rsatkichlar ham shunga mos ravishda o‘zgaradi. Classic versiya 0 dan 100 km/soatgacha taxminan 10,6 soniyada tezlashadi. CVT bilan jihozlangan versiyalarda bu ko‘rsatkich 11 soniya atrofida. Yonilg‘i sarfi rasmiy ma’lumotlarga ko‘ra 100 km ga 6,4–6,5 litrni tashkil etadi. Amaliy testlarda esa 1.5 dvigatel va CVT kombinatsiyasi silliq ishlashi va magistral yo‘llarda taxminan 6,7 litr atrofida sarf ko‘rsatishi qayd etilgan.

O‘lchamlar va qulaylik

O‘lchamlarga kelganda Sonet ixcham, ammo amaliy krossover hisoblanadi. Uzunligi 4120 mm, kengligi 1790 mm. Balandligi komplektatsiyaga qarab 1625–1642 mm oralig‘ida. G‘ildirak bazasi 2500 mm bo‘lib, salon ichida yetarli joy beradi. Klirensi 205 mm, bu esa notekis yo‘llarda harakatni osonlashtiradi. Bagaj hajmi 392 litrni tashkil etadi.

Texnik jihatdan model oddiy va ishonchli konstruktsiyaga ega. Old osma MacPherson turida, orqa osma esa torsion beam tizimida. Old tormozlar disk, orqa tormozlar esa komplektatsiyaga qarab disk yoki baraban bo‘lishi mumkin. Avtomobilning vazni bozorga qarab taxminan 1168–1197 kg oralig‘ida.

Xavfsizlik masalasida Sonet komplektatsiyaga qarab farqlanadi. Barcha versiyalarda old xavfsizlik yostiqchalari mavjud. Ammo yon va parda xavfsizlik yostiqchalari faqat yuqori — Prestige va Black Edition versiyalarida qo‘shiladi. Shu sabab maksimal xavfsizlikni xohlagan xaridorlar aynan shu komplektatsiyalarni tanlashga moyil bo‘ladi.

Modelning afzalliklari

Kia Sonet yosh auditoriya va faol shahar hayoti uchun mo‘ljallangan zamonaviy ixcham krossover hisoblanadi. Model mahalliy bozorda yig‘ilgani sababli avtomobilning yetkazib berish tizimi barqaror, ehtiyot qismlar mavjudligi esa yaxshiroq bo‘ladi. Bu omil servis xizmatlari sifatiga ham ijobiy ta’sir ko‘rsatadi.

Kia Sonet o‘z segmentida qulaylik va moslashuvchanligi bilan ajralib turadi. Uning 205 mm klirensi (avtomobilning yer bilan eng past nuqtasi) yuqori hisoblanadi va bu avtomobilni shahar ichidagi yo‘llar bilan birga, tuman yoki notekis yo‘llarda ham bemalol harakatlana oladigan darajaga olib chiqadi. Krossover geometriyasi esa kundalik foydalanishda qulaylik beradi.

Modelda 1.5 litrli MPI atmosfer dvigatel qo‘llanilgan bo‘lib, u ishonchliligi bilan tanilgan. U 6 pog‘onali mexanik yoki CVT uzatmalar qutisi bilan birga taklif etiladi. Bu kombinatsiya haydovchiga soddalik va tejamkorlikni ta’minlaydi.

Yuqori komplektatsiyalarda esa qo‘shimcha qulayliklar ham mavjud. Jumladan, Drive Mode Select tizimi, simsiz quvvatlash funksiyasi, premium audio tizimi va old o‘rindiqlar ventilyatsiyasi kabi opsiyalar avtomobilni yanada jozibador qiladi.

Kamchiliklari

Kia Sonet’ning bazaviy Classic komplektatsiyasi juda sodda hisoblanadi. Unda ko‘pchilik xaridorlar kutadigan iqlim nazorati, orqa kamera, SmartKey yoki kruiz nazorati kabi funksiyalar yo‘q. Bu narxni pastroq qiladi, ammo amaliy jihatdan jozibadorligini kamaytiradi. Shu sabab ko‘plab xaridorlar oxir-oqibat yuqoriroq — Luxe versiyasiga o‘tishni afzal ko‘radi.

Osma qismi ham hamma uchun qulay bo‘lmasligi mumkin. Xalqaro testlarda Sonet’ning osmasi biroz qattiq ekani qayd etilgan. Ayniqsa past tezlikda yo‘l notekisliklari salonga ko‘proq uzatiladi. O‘zbekiston sharoitida ayrim yo‘llarda bu sezilarli bo‘lishi mumkin. Shu bois xarid qilishdan oldin test-drayv muhim.

Dvigatel masalasida ham ayrim cheklovlar bor. 1.5 litrli atmosfer motor ishonchli va sodda, ammo turbinali raqobatchilar fonida tezlanish bo‘yicha biroz sustroq. Ayniqsa, to‘liq yuk bilan yoki konditsioner yoqilgan holatda bu farq seziladi.