iQOO yangi flagman smartfoni — iQOO 15T modelini rasman taqdim etdi va qurilma Xitoyda sotuvga chiqarildi. Bu haqda ITHome nashri ma’lum qildi.
Kuchli protsessor va o‘yin imkoniyatlari
Yangi smartfon MediaTek’ning Dimensity 9500 Monster platformasi asosida ishlaydi. Kompaniya protsessor o‘yinlarda barqaror ishlash uchun maxsus optimallashtirilganini bildirgan. SoC tarkibiga FPS barqarorligini 34 foizgacha oshiruvchi «monster engine» tizimi integratsiya qilingan.
Shuningdek, alohida Q3 grafik chipi nurlarni kuzatish, tasvirni kattalashtirish va kadrlar chastotasini oshirish vazifalarini bajaradi. Qurilma 140 dan ortiq o‘yinda 144 FPS rejimini qo‘llab-quvvatlaydi. Sovitish uchun esa 8000 mm² hajmdagi bug‘ kamerasi qo‘llangan.
Displey va batareya
Smartfon 6,82 dyuymli AMOLED displey bilan jihozlangan. BOE Q10+ paneli 2K (3186×1440) aniqlik, 1–144 Hz adaptiv yangilanish chastotasi va 4500 nitgacha maksimal yorqinlikni taqdim etadi. Ekranda ko‘zni himoya qilish texnologiyalari hamda 2592 Hz PWM boshqaruv tizimi ishlatilgan.
Qurilmaga 8000 mA/soat sig‘imli akkumulyator o‘rnatilgan bo‘lib, u 100 vattli tezkor quvvatlashni qo‘llab-quvvatlaydi. Kompaniya ma’lumotiga ko‘ra, atigi 5 daqiqalik quvvatlash 3 soatgacha video tomosha qilish imkonini beradi. Faol foydalanishda esa kun oxirida batareyaning yarmidan ko‘pi saqlanib qolishi aytilgan.
Kamera va boshqa funksiyalar
Asosiy kamera tizimi 200 megapikselli bosh sensor va 50 megapikselli ultra keng burchakli moduldan iborat. Bosh kamera optik barqarorlashtirish tizimi va 4 karra zum funksiyasini qo‘llab-quvvatlaydi. Ikkinchi modul esa makro suratga olish hamda ultra keng formatdagi tasvirlar uchun xizmat qiladi.
Qurilma OriginOS 6 tizimida ishlaydi va sun’iy intellekt funksiyalarini qo‘llab-quvvatlaydi. Shuningdek, smartfonda IP68/IP69 himoya darajasi, metall ramka va ekran ostidagi ultratovushli barmoq izi skaneri mavjud.
Narxi
| Xotira varianti | Subsidiyadan keyingi narx |
|---|---|
| 12/256 GB | $485 |
| 16/256 GB | $545 |
| 12/512 GB | $590 |
| 16/512 GB | $645 |
| 16 GB/1 TB | $765 |
Eslatib o‘tamiz, avvalroq Lenovo Legion Y70 smartfonini kuchli batareya bilan taqdim etgan edi.
