Changan CS75 PLUS Blue Whale Super Engine Edition gibrid krossoveri Xitoy bozorida rasman sotuvga chiqarildi. Bu haqda Autohome nashri xabar berdi.
Model xaridorlarga uchta komplektatsiyada taklif qilinmoqda va boshlang‘ich narx 114 ming yuan atrofida belgilangan. Bu taxminan $15,7 mingga teng.
Yangi Changan oilaviy krossover segmentiga mansub bo‘lib, o‘lchamlari jihatidan Geely Monjaro modeliga yaqin hisoblanadi. Avtomobilning uzunligi 4770 mm, g‘ildirak bazasi esa 2800 mmni tashkil qiladi.
Salon zamonaviy texnologiyalar bilan jihozlangan. Old panelda bir vaqtning o‘zida uchta ekran o‘rnatilgan: haydovchi uchun 10,25 dyuymli displey, multimedia tizimi uchun 14,6 dyuymli ekran hamda old yo‘lovchi uchun alohida 12,3 dyuymli monitor mavjud.
Krossoverning asosiy yangiliklaridan biri — CDC Magic Carpet adaptiv osma tizimi bo‘ldi. Ushbu texnologiya yo‘l holatiga moslashib, harakat paytida qulaylikni oshiradi.
Model TianShu haydovchiga yordam tizimi bilan ham jihozlangan. U avtomobilga magistral yo‘llarda mustaqil ravishda qatordan qatorga o‘tish, oqim tezligiga moslashish va murakkab yo‘l tugunlarida xavfsiz harakatlanishga yordam beradi. Shuningdek, avtomatik parkovka va yo‘lakda ushlab turish funksiyalari ham mavjud.
Avtomobil gibrid kuch qurilmasiga ega. Unda 150 ot kuchiga ega 1,5 litrli turbobenzin dvigateli va 244 ot kuchini ishlab chiqaruvchi elektromotor ishlaydi. Tortish batareyasi sig‘imi esa 1,7 kVt·soatni tashkil etadi.
Avvalroq Kursiv Uzbekistan Changan kompaniyasi Xitoy bozorida Changan Eado HEV gibrid sedanini taqdim etgani haqida yozgandi.
