Redmi kompaniyasi tomonidan Redmi Turbo 5 smartfoni Hindiston bozori uchun 16-iyun kuni namoyish etiladi. Bu haqda Gizmochina nashri xabar bermoqda.
Taqdim qilingan reklama materiallarida Redmi Turbo 5 brendning hozirgacha eng tezkor smartfoni sifatida taqdim etilmoqda. Redmi avvalroq qurilma bo‘yicha tizer kampaniyasini boshlagan edi. Unda smartfonning orqa paneli dizayni ko‘rsatilgan.
Hindiston versiyasi avval Xitoyda taqdim etilgan modeldan deyarli farq qilmaydi. Smartfon ikkita asosiy kamera va modullar atrofidagi halqasimon LED yoritgichga ega bo‘ladi. Qurilma qora rangdagi korpusda ham taklif qilinishi kutilmoqda. Taqdimotda qo‘shimcha qurilmalar namoyish etilishi yoki etilmasligi hozircha noma’lum.
Redmi Turbo 5 6,59 dyuymli OLED ekran bilan jihozlanadi. Displey 1,5K aniqlik va 120 Hz yangilanish tezligini qo‘llab-quvvatlaydi. Ekranning maksimal yorqinligi 3500 nitgacha yetishi aytilmoqda.
Smartfon MediaTek Dimensity 8500-Ultra chipi asosida ishlaydi. Qurilma Android 16 bazasidagi HyperOS 3 interfeysi bilan chiqishi kutilmoqda. Redmi Turbo 5’ning asosiy jihatlaridan biri katta batareyadir. Smartfon 7560 mA/soat sig‘imli akkumulyatorga ega bo‘lishi aytilmoqda.
Qurilma 100 W tezkor quvvatlashni qo‘llab-quvvatlaydi. Shuningdek, 27 W teskari quvvatlash imkoniyati ham bo‘ladi. Smartfon IP68/IP69 darajasidagi himoya bilan jihozlanadi.
Avvalroq «Kursiv» may oyidagi eng yaxshi smartfon e’lon qilingani haqida yozgan edi.
