Futbol bo‘yicha Jahon chempionati guruh bosqichining 1-turidan o‘rin olgan uchrashuvda Gana terma jamoasi Panamani 1:0 hisobida mag‘lub etdi.
O‘yinning asosiy vaqti golsiz durang bilan yakunlanayotgan bir paytda, hakam tomonidan qo‘shib berilgan 90+5-daqiqada Gana terma jamoasi vakili Kaleb Yirenki raqib darvozasini ishg‘ol qildi. U Tomas-Asantening uzatmasidan so‘ng jamoasiga g‘alaba keltiruvchi yagona gol muallifiga aylandi.
O‘yin davomida hakam tomonidan bir nechta sariq kartochkalar ko‘rsatildi. Jumladan, uchrashuv qahramoni Kaleb Yirenki, shuningdek, Sezar Blekmen va Harvi ogohlantirildi.
Ma’lumot uchun, «L» guruhi doirasidagi 2-tur uchrashuvlarida Gana Angliya terma jamoasi bilan, Panama esa Xorvatiya terma jamoasiga qarshi maydonga tushadi.
Avvalroq Kursiv nashri Xorvatiya mundialni mag‘lubiyat bilan boshlagani haqida xabar bergan edi.
