2027-yilgi Chevrolet Bolt elektromobili batareya quvvati deyarli tugagan holatda qanday harakatlanishi amaliy sinovda tekshirildi. Bu haqda GMAutority nashri xabar berdi.
Yangi Chevrolet Bolt avvalgi avlodga nisbatan bir qator muhim o‘zgarishlarga ega. Model yangilangan elektr yuritma tizimi, tezroq quvvatlanish imkoniyati, NACS standartidagi zaryadlash porti va litiy-temir-fosfat, ya’ni LFP turidagi yangi batareya bilan jihozlangan.
Aynan LFP batareya bu sinovni qiziqarli qiladi. Bunday akkumulyatorlar an’anaviy nikel asosidagi batareyalarga nisbatan tekisroq kuchlanish egri chizig‘iga ega. Shu sababli avtomobil tizimi batareyaning ayniqsa eng past yoki eng yuqori quvvat darajasida qancha energiya qolganini aniq hisoblashda qiynalishi mumkin.
Sinov muallifining aytishicha, avtomobil harakat boshlanishidan oldin ham noodatiy holat ko‘rsatgan. Mashina kechqurun 5 foiz quvvat bilan qoldirilgan, ertasi kuni ertalab esa indikator 11 foizni ko‘rsatgan. Bu LFP batareyalarning quvvat darajasini hisoblashdagi o‘ziga xos xususiyatlari bilan bog‘liq bo‘lishi mumkin.
Qanday model sinalgan
Sinovda 2027-yilgi Bolt RS versiyasidan foydalanilgan. Avtomobil 215/50R17 o‘lchamdagi Michelin e.Primacy butun mavsumga mo‘ljallangan shinalari bilan jihozlangan. Testning maqsadi oddiy yurish zaxirasini aniqlash emas, balki batareya deyarli tugaganda Bolt qanday harakat qilishini bilish bo‘lgan.
Turli elektromobillarda quvvat indikatori nol foizni ko‘rsatganidan keyin ham ma’lum miqdorda yashirin zaxira energiya qolishi mumkin. Biroq sinov muallifining ta’kidlashicha, avvalgi General Motors elektromobillarida bunday zaxira odatda juda kam bo‘lgan yoki umuman bo‘lmagan.
Sinov juda past quvvat darajasidan boshlangan va Bolt to‘liq to‘xtaguncha haydalgan. Avtomobil harakatdan to‘xtagach, u portativ DC tez quvvatlash treyleri orqali qayta zaryadlangan. Quvvatlash Bolt’ning NACS porti orqali amalga oshirilgan.
Testdan so‘ng muallif Bolt’ning xatti-harakatini avval sinovdan o‘tkazilgan boshqa GM elektromobillari bilan solishtirgan. Uning aytishicha, Equinox EV va Cadillac Escalade IQ modellarida ham avtomobil quvvat indikatori 1 foizni ko‘rsatgan paytda to‘xtagan.
Mavjud ma’lumotlarda 2027-yilgi Bolt batareyasi tugaganidan keyin aynan necha kilometr qo‘shimcha harakatlangani ko‘rsatilmagan. Biroq sinov yangi LFP batareyali Bolt past quvvat darajasida qanday ishlashini va zaxira energiya bo‘yicha GM elektromobillarining avvalgi xususiyatlarini saqlab qolgan-qolmaganini baholashga qaratilgan.
Eslatib o‘tamiz, Kursiv Uzbekistan nashri Chevrolet’ning mashhur avtomobiliga chegirma e’lon qilingani haqida yozgan edi.
