Lynk & Co kompaniyasi 29-iyun kuni yangi Lynk & Co 07 GT gibrid universalining oldindan sotuvini boshladi. Bu haqda CarNewsChina nashri xabar bermoqda.
Yangi Lynk & Co 07 GT’ning boshlang‘ich narxi 165 800 yuandan boshlanadi. Bu taxminan 24,4 ming AQSh dollariga teng. Modelning rasmiy savdosi iyul oyida boshlanishi, yetkazib berishlar esa shundan keyin yo‘lga qo‘yilishi rejalashtirilgan.
Model Lynk & Co‘ning EM-P aqlli elektr-gibrid tizimi asosida ishlab chiqilgan. Avtomobil CMA platformasiga qurilgan bo‘lib, aerodinamik kuzov, frameless eshiklar, sport kuzov to‘plami va tomga o‘rnatiladigan yuk tizimi bilan jihozlanadi. Tashqi dizaynda 94 ta LED elementdan iborat yorug‘lik chizig‘i ham qo‘llangan.
Texnik imkoniyatlar
Texnik jihatdan model 1,5 litrli turbo benzin dvigateli va uch pog‘onali maxsus gibrid transmissiya bilan jihozlangan. Ichki yonuv dvigateli 120 kVt quvvat ishlab chiqaradi. Bazaviy bitta motorli versiyalarda tizimning umumiy quvvati 300 kVtga yetadi va avtomobil 0 dan 100 km/soat tezlikka 5,5 soniyada chiqadi.
Eng kuchli ikki motorli to‘liq yuritmali versiyada umumiy quvvat 390 kVt yoki 530 ot kuchini tashkil qiladi. Bu Lynk & Co 07 GT’ni nafaqat oilaviy universal, balki yuqori dinamikaga ega sport-gibrid model sifatida ham namoyon qiladi.
Barcha versiyalarda 28,3 kVt·soat sig‘imli litiy-ion batareya o‘rnatiladi. Bitta motorli modifikatsiyalar CLTC sikli bo‘yicha 200 km sof elektr yurish zaxirasiga ega. Ularning umumiy yurish masofasi 1 422 kmga yetadi. To‘liq yuritmali kuchli versiyada elektr yurish zaxirasi 170 km, umumiy masofa esa 1 315 kmni tashkil qiladi.
Dizayn va o‘lcham
Avtomobilning uzunligi 4 846 mm, kengligi 1 900 mm, balandligi 1 485 mm, g‘ildirak bazasi esa 2 843 mmga teng. Ayrim sport versiyalarida kuzov uzunligi maxsus sport to‘plami hisobiga 4 866 mmga yetadi. Old yuritmali versiyada yukxona hajmi 614 litrni tashkil etadi.
Shassi old tomonda MacPherson, orqa tomonda esa ko‘p richagli mustaqil osma tizimga ega. Bazaviy versiyalarda gidravlik o‘zgaruvchan amortizatorlar standart sifatida beriladi. To‘liq yuritmali kuchli versiyalarda esa magnitoreologik amortizatorlar qo‘llanadi, bu yo‘l va trek sharoitida osma tizimning moslashuvchanligini oshiradi.
Salon markazida 15,4 dyuymli yuqori aniqlikdagi ekran joylashgan. Multimedia va avtomobil funksiyalari Flyme Auto 2.5 aqlli tizimi orqali boshqariladi. Platformada 5 nanometrli salon chipi ishlatiladi, u soniyasiga 30 trillion operatsiyani bajarishga qodir. Shuningdek, avtomobil tom qismida lidar sensori bilan jihozlanadi, bu haydovchiga yordam tizimlari ishlashini qo‘llab-quvvatlaydi.
Eslatib o‘tamiz, Kursiv Uzbekistan nashri yangi Chevrolet Tracker 2027 avtomobilining narxlari e’lon qilingani haqida yozgan edi.
