Lionel Messi futbol tarixidagi eng buyuk o‘yinchilardan biri hisoblanadi. U sakkiz marta «Oltin to‘p»ni qo‘lga kiritgan, Argentina terma jamoasi bilan jahon chempioni bo‘lgan va faoliyati davomida ko‘plab rekordlarni yangilagan. Quyida Kursiv Uzbekistan futbolchi haqidagi eng qiziqarli faktlarni taqdim etadi.
Messi italyan va katalon ildizlariga ega
Lionel Andres Messi Kuchchittini 1987-yil 24-iyunda Argentinaning Rosario shahrida tug‘ilgan. Uning oilasi oddiy ishchilar oilasi bo‘lgan. Messining ajdodlari Italiya va Kataloniyadan Argentinaga ko‘chib kelgan. 2005-yilda u Ispaniya fuqaroligini ham olgan, biroq Argentina terma jamoasida o‘ynashni tanlagan.
Bolaligida jiddiy kasallik aniqlangan
Messi bolaligida o‘sish gormoni yetishmovchiligi bilan kasallangani aniqlangan. Shu sababli u tengdoshlariga qaraganda past bo‘yli bo‘lgan.
Davolanish juda qimmat bo‘lgani uchun Messi oilasi katta qiyinchilikka duch kelgan. Keyinchalik «Barselona» uning davolanish xarajatlarini qoplashga rozi bo‘lgan va bu futbolchining Ispaniyaga ko‘chib o‘tishiga sabab bo‘lgan.
Gollarini buvisiga bag‘ishlaydi
Messi gol urganidan keyin ko‘pincha ikki qo‘lini osmonga ko‘taradi. Bu harakat uning buvisi Seliyaga bag‘ishlangan.
Aynan buvisi Messining futbolga qiziqishini qo‘llab-quvvatlagan. U Messi katta yulduzga aylanganini ko‘ra olmagan, biroq futbolchi buvisini doimo eslab yuradi.
Eng ko‘p daromad oladigan sportchilardan biri
Messi uzoq yillardan beri dunyoning eng ko‘p daromad oladigan sportchilari qatorida turadi.
U futbol klublaridagi maoshi, bonuslar va reklama shartnomalari orqali juda katta daromad topgan. 2023-yilda uning yillik daromadi $130 mln atrofida bo‘lgani aytilgan.
Qonun bilan bog‘liq muammoga duch kelgan
2016-yilda Messi va uning otasi Ispaniyada soliq to‘lashdan bo‘yin tovlash ishi bo‘yicha sudlangan. Sud ularga 21 oylik qamoq jazosi tayinlagan, biroq jazo shartli muddat bilan almashtirilgan. Messining o‘zi moliyaviy ishlar bilan otasi shug‘ullanganini va hujjatlarni to‘liq tushunmaganini aytgan.
Uni shaxsiy qo‘riqchi kuzatib yuradi
Messi 2023-yilda AQShning «Inter Mayami» klubiga o‘tganidan keyin uning yonida doimiy shaxsiy qo‘riqchi paydo bo‘lgan.
Qo‘riqchi futbolchini maydon chetida, tadbirlarda va oilasi bilan yurganida ham kuzatib boradi. Bu muxlislar maydonga yugurib chiqishi yoki futbolchiga haddan tashqari yaqinlashishining oldini olish uchun qilingan.
Rafiqasi bilan bolaligidan tanish
Messi bo‘lajak rafiqasi Antonella Rokutso bilan besh yoshida tanishgan.
Ular Rosarioda bir hududda ulg‘aygan. Juftlik 2008-yildan munosabatda bo‘lgan, 2017-yilda esa turmush qurgan. Hozir ularning uch nafar farzandi bor.
Messi 40 dan ortiq Ginnes rekordiga ega
Lionel Messi 40 dan ortiq Ginnes rekordiga ega.
Uning rekordlari orasida eng ko‘p «Oltin to‘p» sovrini, futboldagi tarixiy natijalar, shuningdek, ijtimoiy tarmoqlardagi ko‘rsatkichlar ham bor. Shu sababli Messi nafaqat futbol maydonida, balki sport tarixida ham alohida o‘rin egallaydi.
Eslatib o‘tamiz, avvalroq Abbosbek Fayzullayev 2026-yilgi jahon chempionatida Argentina terma jamoasiga muxlislik qilayotgani haqida xabar berilgandi. Futbolchi Instagram’dagi sahifasida Argentina va Angliya bahsidan hikoya joyladi. Messi tasvirlangan rasmda futbolchi toj imojisini qo‘ygan.
