Amazon AQSh Federal aloqa komissiyasidan orbitaga 5,1 mingtagacha internet sun’iy yo‘ldoshini chiqarishga ruxsat so‘radi. Kompaniya bu orqali smartfon va boshqa qurilmalarga bevosita sun’iy yo‘ldosh orqali internet ulanishini ta’minlaydigan D2D tarmog‘ini yaratmoqchi.
Tarmoq bevosita qurilmalarga ulanadi
Amazon rejasiga ko‘ra, D2D, ya’ni direct-to-device tarmog‘i an’anaviy mobil aloqa minoralarisiz ishlaydi. Bunda internet yoki aloqa xizmati sun’iy yo‘ldosh orqali to‘g‘ridan to‘g‘ri smartfon va boshqa qurilmalarga yetkaziladi.
Kompaniya bunday xizmatni birinchi marta aprel oyida e’lon qilgan edi. O‘shanda Amazon sun’iy yo‘ldosh operatori Globalstar’ni taxminan $11,6 mlrdga sotib olishini bildirgan.
Amazon Globalstar infratuzilmasidan foydalanadi
Amazonning FCCga yuborgan arizasida D2D tarmog‘i kompaniyaning mavjud infratuzilmasi, Globalstar sun’iy yo‘ldoshlari va chastota resurslari asosida shakllantirilishi aytilgan.
Kompaniya, avvalo, hozirgi mobil operatorlar yetib bormagan yoki aloqa sifati yetarli bo‘lmagan hududlardagi foydalanuvchilarga e’tibor qaratmoqchi.
Favqulodda vaziyatlarda ham qo‘llanishi mumkin
Amazon bu tarmoqdan qidiruv-qutqaruv ishlari va boshqa favqulodda holatlarda foydalanish mumkinligini ham ko‘rsatgan.
Shuningdek, xizmat yerusti tarmoqlari yetib borishi qiyin bo‘lgan uzoq ish maydonlari, transport parkları va ta’minot zanjirlari uchun aloqa imkoniyatlarini kengaytirishi mumkin.
Amazon arizasida kompaniya hozirgi tarmoqlar qamrab olmagan hududlarda yashaydigan, ishlaydigan yoki safar qiladigan millionlab odamlar uchun D2D aloqasi imkoniyatidan foydalanmoqchi ekani qayd etilgan.
Bu bozorda hozir Starlink yetakchi
Financial Times ma’lumotiga ko‘ra, Amazonning ushbu arizasi kompaniyaning sun’iy yo‘ldosh orqali mobil aloqa segmentiga ilk jiddiy qadami bo‘ldi. Hozir bu yo‘nalishda SpaceX’ning Starlink xizmati yetakchi hisoblanadi.
SpaceX orbitada 10 mingdan ortiq faol sun’iy yo‘ldoshga ega. Starlink 150 dan ortiq mamlakatda ishlaydi va sun’iy yo‘ldoshlar orqali yuqori tezlikdagi internet xizmatini taklif qiladi.
Starlink T-Mobile US va Britaniyaning Virgin Media O2 kompaniyalari bilan hamkorlik qilib, oddiy mobil tarmoqlar ishlamaydigan hududlarda mijozlarga aloqa taqdim etmoqda.
Amazon hozircha 390 sun’iy yo‘ldoshga ega
Amazonning orbitada hozir 390 ta sun’iy yo‘ldoshi bor. Iyun oyida FCC kompaniyaga oy oxirigacha taxminan 1,6 mingta sun’iy yo‘ldoshni uchirish bo‘yicha muddatni uzaytirgan.
Bozorda Amazon va Starlinkdan tashqari boshqa o‘yinchilar ham bor. Masalan, AST SpaceMobile kompaniyasi Vodafone bilan hamkorlik qilmoqda.
SpaceX aksiyalari pasaydi
Dushanba kungi savdolarda SpaceX aksiyalari 1,4 foizga arzonlab, $113,5 ga tushdi. Kun davomida ular $108,66 gacha pasaygan.
Amazon aksiyalari esa 27-iyul kuni 0,3 foizga tushib, $231,4 ni tashkil etdi.
Eslatib o‘tamiz, avvalroq Tesla Cybercab’ga yangi avlod Starlink interneti o‘rnatilgani xabar qilingandi. E’lon qilingan sxemaga ko‘ra, antenna avtomobil tomiga kameralar va boshqa sensorlar yoniga joylashtirilgan.
