Apple sentabr oyidagi taqdimotida o‘zining ilk bukiladigan iPhone modelini namoyish qilishi kutilmoqda. Bloomberg jurnalisti Mark Gurmanning aytishicha, Apple ichida ham bukiladigan model aynan Ultra deb atalmoqda.
Avvalroq qurilma norasmiy ravishda iPhone Fold nomi bilan tilga olinayotgan edi, biroq so‘nggi ma’lumotlarda iPhone Ultra nomi tobora ko‘proq uchramoqda.
Shunga qaramay, bu nom smartfonning yakuniy tijoriy nomi bo‘lishini hali tasdiqlamaydi. Apple ichki loyihalar uchun vaqtinchalik yoki ishchi nomlardan foydalanishi mumkin.
Mark Gurman: kompaniya ichida uni Ultra deb atashadi
Mark Gurmanning ma’lum qilishicha, Apple xodimlari orasida yangi bukiladigan iPhone uchun Ultra nomi qo‘llanmoqda.
«Kompaniya ichida hamma uni Ultra deb ataydi. Oxir-oqibat nima bo‘lishini ko‘ramiz», — dedi u.
Biroq Gurman Apple’ning mahsulotlarni ishlab chiqish jarayoni juda yopiq ekaniga e’tibor qaratdi. Hatto kompaniya xodimlarining o‘zi ham bevosita ishlamayotgan mahsulotlar haqida to‘liq ma’lumotga ega bo‘lmasligi mumkin. Shu bois ichki nom yakuniy savdo nomidan farq qilishi ehtimoli bor.
Avval model iPhone Fold deb atalgan edi
Bukiladigan iPhone haqidagi dastlabki sizib chiqishlarda qurilma ko‘proq iPhone Fold nomi bilan tilga olinardi. 2026-yil bahoridan boshlab esa insayderlar Apple yangi modelni iPhone Ultra nomi bilan chiqarishi mumkinligini ayta boshladi.
Mark Gurmanning avvalgi ma’lumotlariga ko‘ra, Apple bukiladigan iPhone’ni sentabr oyida iPhone 18 Pro va iPhone 18 Pro Max bilan bir vaqtda taqdim etishi mumkin. Smartfon savdosi ham shu davrda boshlanishi kutilmoqda, biroq dastlabki partiyalar soni cheklangan bo‘lishi mumkin.
Ekrani qariyb 7,7 dyuym bo‘lishi mumkin
Sizib chiqqan ma’lumotlarga ko‘ra, Apple’ning ilk bukiladigan smartfoni ochilgan holatda qariyb 7,7 dyuymli ichki ekran bilan jihozlanadi.
Qurilmada Face ID’dan voz kechilishi va uning o‘rniga quvvat tugmasiga o‘rnatilgan Touch ID qaytarilishi mumkin.
Eslatib o‘tamiz, Kursiv Uzbekistan nashri iPhone 18 Pro Max smartfoni qanday batareya bilan chiqishi haqida yozgan edi.
