Xiaomi’ning Redmi K100 Pro seriyasi sotuvga chiqqanidan keyingi dastlabki haftada yuqori talab qayd etdi. Ayniqsa, K100 Pro Max modeli shu davrda avvalgi K90 Pro Max’dan qariyb 35% ko‘proq sotildi.
Redmi K100 Pro Max avvalgi modeldan o‘zib ketdi
ITHome nashri @RDObservation ma’lumotlariga tayanib yozishicha, Redmi K100 Pro va K100 Pro Max’ning ilk yetti kundagi jami savdosi K90 seriyasining xuddi shu davrdagi natijasining qariyb 95 foiziga yetgan.
Bunda modellarning natijasi keskin farq qilgan. Redmi K100 Pro savdosi taqqoslanayotgan davrda Redmi K90 ko‘rsatkichining qariyb 70 foizini tashkil etgan. Redmi K100 Pro Max esa avvalgi K90 Pro Max natijasining 135 foiziga yetib, undan taxminan 35% ko‘proq sotilgan.
K100 Pro Max ilk kunning o‘zidayoq rekord qayd etdi
Redmi K100 Pro va K100 Pro Max 11-avgust kuni taqdim etilgan. Smartfonlar flagman Snapdragon protsessorlari bilan jihozlangan. K100 Pro’da 8580 mA·soat, K100 Pro Max’da esa 9070 mA·soat sig‘imli akkumulyator o‘rnatilgan. Shuningdek, qurilmalarning audiotizimi Bose bilan hamkorlikda sozlangan.
Xiaomi rahbari Lu Veybin avvalroq K100 Pro Max’ning sotuvga chiqqan birinchi kundagi natijasi K90 Pro Max ko‘rsatkichining 150 foiziga yetganini ma’lum qilgan edi. Bu yangi model ilk kunning o‘zida avvalgisidan qariyb 50% ko‘proq sotilganini anglatadi.
Avvalroq Kursiv Uzbekistan Xiaomi Redmi K100 Pro va K100 Pro Max flagman smartfonlarini taqdim etgani haqida xabar bergan edi. Qurilmalar Snapdragon 8 Elite Gen 5 protsessorlari, 200 MP kameralar va katta sig‘imli akkumulyatorlar bilan jihozlangan.
