Qozog‘istonlik shaxmatchi Bibisara Assaubayevaning onasi ayollar bahsida Qozog‘iston terma jamoasini, erkaklar o‘rtasidagi musobaqada esa O‘zbekiston terma jamoasini qo‘llab-quvvatlayotganini aytdi. U bu haqida Instagram sahifasida ma’lum qildi.
U O‘zbekistonda o‘tayotgan Shaxmat olimpiadasi haqida gapirar ekan, ikki terma jamoaga nisbatan turlicha muxlislik qilayotganini ta’kidladi.
Ayollar bahsida Qozog‘istonni qo‘llab-quvvatlaydi
Assaubayevaning onasi ayollar terma jamoasi haqida shunday dedi:
«Albatta, Qozog‘iston ayollar terma jamoasiga muxlislik qilaman. Qizlar barcha kuchini ishga solib, sizlarning yurtingizda oltin medalni qo‘lga kiritishi kerak».
Erkaklar bahsida esa O‘zbekistonga muxlis
Shuningdek, o‘qing: Shaxmat Olimpiadasi. O‘zbekiston 5-turdan so‘ng peshqadamlikni qo‘lga oldi
Erkaklar musobaqasida esa u O‘zbekiston terma jamoasini qo‘llab-quvvatlashini bildirdi.
«Erkaklar terma jamoasi bo‘yicha esa, albatta, O‘zbekiston milliy jamoasiga muxlislik qilaman. Chunki yigitlar juda yosh, juda ambitsiyali va nihoyatda iste’dodli».
U O‘zbekiston erkaklar terma jamoasining yosh tarkibi va salohiyatini alohida ta’kidladi. Ayollar terma jamoasi haqidagi fikriga izohda qizi Bibisara Assaubayevani, erkaklar bahsida esa u Javohir Sindarovni belgiladi.
Eslatib o‘tamiz, avvalroq Sindarov Olimpiadadagi ilk durangiga izoh bergan edi.
