Xiaomi 27-oktabr kuni taqdim etiladigan Redmi K100 smartfonining batareyasi haqida yangi ma’lumotlarni e’lon qildi. Qurilma Jinshajiang turkumidagi 10 000 mA/soat sig‘imli akkumulyator bilan jihozlanadi.
Kompaniya ma’lumotiga ko‘ra, yangi batareya −20 daraja haroratda ham barqaror ishlashga mo‘ljallangan.
Batareyada 28 foiz kremniy-uglerod materiali bor
Redmi K100 akkumulyatorida kremniy-uglerod materialining ulushi 28 foizni tashkil etadi.
Batareyaning hajmiy energiya zichligi 957 Vt·soat/litrga yetadi. Xiaomi uni Jinshajiang turkumidagi eng kuchli akkumulyator sifatida taqdim etmoqda.
Qurilma 100 W quvvatdagi tezkor simli quvvatlashni ham qo‘llab-quvvatlaydi.
Sovuq havoda ham ishlashi aytilmoqda
Yangi batareyaning muhim jihatlaridan biri — past haroratdagi ishlash qobiliyati.
Xiaomi ma’lumotiga ko‘ra, Redmi K100 akkumulyatori −20 daraja haroratda ham barqaror ishlashni davom ettira oladi. Bu ayniqsa qishki sharoitlarda batareya sig‘imining tez pasayishi muammosini kamaytirishga qaratilgan.
Snapdragon 8 Ultra va D2 chipi kutilmoqda
Dastlabki ma’lumotlarga ko‘ra, Redmi K100 Snapdragon 8 Ultra protsessori bilan jihozlanadi.
Shuningdek, smartfonda alohida D2 grafik chipi bo‘lishi kutilmoqda. U o‘yinlarda tasvirni yaxshilash va grafik yuklamani qayta ishlashga yordam berishi mumkin.
165 Hz ekran va 3500 nit yorqinlik
Redmi K100 6,83 dyuymli displey bilan jihozlanishi aytilmoqda. Ekranning yangilanish chastotasi 165 Hz gacha, maksimal yorqinligi esa 3500 nitgacha yetishi mumkin.
Shuningdek, Xiaomi Green Mountain 4.0 ko‘zni himoya qilish texnologiyasi ham qo‘llanilishi kutilmoqda.
Bose dinamiklari ham bo‘lishi mumkin
Smartfon uchun Bose sozlamalariga ega stereo dinamiklar, kattalashtirilgan vibratsiya motori va yangi yorqin yashil rang varianti ham tilga olinmoqda.
Qurilma Xiaomi HyperOS 4 operatsion tizimida ishlashi kutilmoqda.
Redmi K100’ning to‘liq texnik xususiyatlari va narxi 27-oktabrdagi rasmiy taqdimotda ma’lum bo‘ladi.
Avvalroq «Kursiv» Redmi K100 Firefly Green rangida namoyish etilgani haqida yozgan edi.
