Redmi K100 smartfonining yangi tafsilotlari ochiqlandi. Kompaniya qurilma 26-oktabr kuni Xitoyda taqdim etilishini ma’lum qilgan.
Model kuchli batareya, yuqori yangilanish chastotasiga ega ekran va sun’iy intellekt funksiyalariga urg‘u berilgan HyperOS 4 tizimi bilan chiqadi.
Ekran 165 Hz bo‘ladi
Redmi K100 6,83 dyuymli AMOLED ekran bilan jihozlanadi. Displey 165 Hz yangilanish chastotasi va 3 500 nitgacha maksimal yorqinlikni qo‘llab-quvvatlaydi.
Smartfonda alohida D2 grafik tezlatkichi ham bo‘ladi. Kompaniya ta’kidlashicha, bu chip Honor of Kings o‘yinini maksimal grafik sozlamalarda yuqori kadrlar chastotasida ishlatishga yordam beradi.
50 MP Light and Shadow Hunter 800 kamera
Asosiy kamera 50 MP Light and Shadow Hunter 800 sensoriga ega bo‘ladi. Sensor o‘lchami 1/1,55 dyuym, obyektiv diafragmasi esa f/1,68 ni tashkil etadi.
Orqa panelda jami ikkita kamera joylashtiriladi. Shuningdek, ekran ostiga ultratovushli barmoq izi skaneri o‘rnatiladi.
IP68 va yettita antenna
Redmi K100 IP68 standarti bo‘yicha suv va changdan himoyalanadi.
Smartfon stereo dinamiklar, kuchli vibratsiya motori va aloqa sifatini yaxshilashga mo‘ljallangan yettita antenna bilan jihozlanadi.
HyperOS 4 va Super AI 2.0
Qurilma zavoddan HyperOS 4 operatsion tizimi bilan chiqadi.
Tizim Xiaomi MiMo katta til modeliga asoslangan Super AI 2.0 sun’iy intellekt funksiyalarini oladi. Kompaniya maxfiylik va shaxsiy ma’lumotlarni himoya qilish vositalari ham kengaytirilishini bildirgan.
10 000 mA/soat batareya
Avvalroq Redmi K100 10 000 mA/soat sig‘imli batareya bilan jihozlanishi ma’lum qilingan edi.
Smartfon 100 W quvvatli simli tezkor quvvatlashni qo‘llab-quvvatlaydi.
Uchta rangda sotuvga chiqadi
Redmi K100 uchta rang variantida taklif etiladi. Ular orasida yangi Firefly Green rangi ham bor.
Xitoyda smartfonga oldindan buyurtmalar Xiaomi’ning rasmiy sayti orqali boshlangan. Redmi K100 kompaniyaning avvalroq taqdim etilgan K100 Pro va K100 Pro Max modellariga qo‘shiladi.
Avvalroq «Kursiv» Redmi K100 10 000 mA/soatli batareya olishi haqida yozgan edi.
