O‘zbekistonlik grossmeyster Nodirbek Abdusattorov Freestyle Chess Tour musobaqasining Parijdagi bosqichida yettinchi o‘rin uchun kechgan bahsda rossiyalik Ian Nepomniashiga yutqazdi. Bellashuv natijasiga ko‘ra, Abdusattorov $20 ming, Nepomniashi esa $30 ming mukofotga ega bo‘ldi.
Turnirda norvegiyalik afsona Magnus Karlsen g‘oliblikni qo‘lga kiritdi. U finalda AQSH vakili Hikaru Nakamurani mag‘lub etdi va $200 ming yutib oldi. Nakamuraga esa ikkinchi o‘rin uchun $140 ming mukofot berildi.
Kuchli uchlikni yana bir amerikalik – Fabiano Karuana yakunlab, $100 ming bilan taqdirlandi.
Eslatib o‘tamiz, erkin shaxmat yo‘nalishidagi mazkur nufuzli musobaqa 8 – 15 aprel kunlari Fransiyaning Parij shahrida bo‘lib o‘tdi. Uning navbatdagi bosqichi esa iyul oyi o‘rtalarida Nyu-Yorkda o‘tkazilishi rejalashtirilgan.
Avvalroq Kursiv Uzbekistan Magnus Karlsen Nodirbek Abdusattorovni raqib sifatida tanlagani haqida xabar bergan edi.
