Angliyada «Manchester Siti» va «Lids» o‘rtasidagi uchrashuv 3:2 hisobida mezbonlar foydasiga yakunlandi. Ushbu bahsda o‘zbekistonlik himoyachi Husanov maydonga tushmadi.
Uchrashuvning 1-daqiqasidayoq «Manchester Siti» hisobni ochdi. Fil Foden Matyus Nunes uzatmasidan so‘ng darvozani aniq ishg‘ol qildi – 1:0.
25-daqiqada Yosko Gvardiol qaytgan to‘pni darvozaga joylab, hisobni 2:0 ko‘rinishiga keltirdi. Ikkinchi bo‘limda «Lids» bosimni kuchaytirdi. 49-daqiqada Dominik Kalvert Lyuin yaqin masofadan gol urdi va farqni qisqartirdi.
66-daqiqada Gvardiol qo‘pollik qilgani uchun hakam penalti belgiladi va unga sariq kartochka ko‘rsatdi. 68-daqiqada Lukas Nmecha 11 metrlik zarbada imkoniyatni boy berdi. Biroq qaytgan to‘pni o‘zi darvozaga yo‘llab, muvozanatni tikladi – 2:2.
Bahs yakuniga yetib borar ekan, hakam 10 daqiqa qo‘shimcha vaqt belgiladi. 90+1-daqiqada Rayan Sherki uzatmasini qabul qilgan Fil Foden jarima maydoni tashqarisidan kuchli zarba bilan g‘alaba golini urdi.
«Manchester Siti» dramatik o‘yinda muhim uch ochkoni qo‘lga kiritdi. «Lids» munosib qarshilik ko‘rsatgan bo‘lsa-da, so‘nggi daqiqalarda ochkolarni boy berdi.
Eslatib o‘tamiz, Kursiv Uzbekistan nashri «Bayer» «Manchester Siti»ni mag‘lub etgani haqida yozgan edi.
