Salkam 17 ming muxlis 2026-yilgi FIFA Jahon chempionati chiptalarini qaytarib berdi. Bu haqda Iordaniyaning Roya News portali xabar berdi.
Portal ma’lumotlariga ko‘ra, chiptalarning bekor qilinishi muxlislarning shaxsiy xavfsizligi borasidagi xavotirlari, shuningdek, Jahon chempionati mezbon davlatlaridan biri bo‘lgan Qo‘shma Shtatlardagi siyosiy vaziyat bilan bog‘liq.
Ta’kidlanishicha, yangi boykot to‘lqini AQSh prezidenti Donald Trampning bayonotlari va AQSh rasmiylarining xalqaro miqyosda, jumladan, Venesuela va Meksikaga nisbatan harakatlaridan keyin kuchaygan.
Keng tarqalgan chiptalar bekor qilinishi fonida FIFA bu hafta favqulodda yig‘ilish o‘tkazishni rejalashtirdi. Tashkilot rahbariyati turnir oldidan chiptalar savdosining pasayishi, muxlislarning xavfsizlik borasidagi xavotirlariga oid xavflarni muhokama qilishi kutilmoqda.
2026-yilgi FIFA Jahon chempionati 11-iyundan 19-iyulgacha Qo‘shma Shtatlar, Kanada va Meksikada bo‘lib o‘tishi rejalashtirilgan. Tramp 2026-yilgi Jahon chempionati qur’a tashlash marosimida ishtirok etdi. Oq uy rahbariga FIFA Tinchlik mukofoti ham topshirildi. Mukofotni e’lon qilish videosida u boshqa narsalar qatori, butun dunyo bo‘ylab qurolli mojarolarga chek qo‘yishga qo‘shgan hissasi va Ukraina inqirozini hal qilishga ko‘maklashish borasidagi sa’y-harakatlari uchun taqdirlangani ta’kidlangan.
3-yanvar kuni AQSh kuchlari Venesuela prezidenti Nikolas Maduro va uning rafiqasini qo‘lga olib, Qo‘shma Shtatlarga olib borishdi va u yerda ularga narkoterrorizmda ayblov qo‘yildi. Tramp Vashingtonning Venesuela ustidan «vaqtinchalik nazorat»ni o‘z qo‘liga olish niyatini e’lon qildi. Keyinchalik, 9-yanvar kuni u Meksikadagi giyohvand moddalar kartellariga qarshi yerusti hujumlarini boshlash rejasini e’lon qildi va jinoiy guruhlar mamlakatni samarali nazorat qilayotganini da’vo qildi.
Avvalroq «Kursiv» AQSh prezidenti Donald Tramp tomonidan joriy etilgan sayohat taqiqlari sababli Eron, Gaiti, Kot-d’Ivuar va Senegal muxlislari 2026-yilgi Jahon chempionati o‘yinlariga bora olmasligi mumkinligi haqida yozgandi.
