Qaysi brendlar eng yaxshi avtomobillarni ishlab chiqaradi

Consumer Reports hisobotida bir nechta brendlar ishonchlilik, egalar qoniqishi, xavfsizlik va yo‘l sinovlari natijalari asosida baholandi. Baholashda yangi avtomobillarning Overall Score ko‘rsatkichi asos qilib olindi.

2025-yil yakunlariga ko‘ra, reytingda yana bir bor Subaru birinchi o‘rinni egalladi. Consumer Reports mutaxassislarining ta’kidlashicha, Subaru avtomobillari sinov paytida darhol bilinmaydigan afzalliklarga ega. Brend ishonchli texnik qismlardan foydalanadi, zamonaviy xavfsizlik tizimlari bilan jihozlangan va favqulodda vaziyatlarda tormozlash hamda boshqaruv testlarida yuqori natija ko‘rsatadi.

Ikkinchi o‘rinni BMW egalladi. Mutaxassislar BMW’ni hashamatli avtomobillar orasida mezon sifatida baholamoqda. Ta’kidlanishicha, ushbu brend uzoq yillardan buyon nafaqat haydash zavqi, balki ishonchlilik bo‘yicha ham Yevropadagi raqobatchilaridan ustun kelmoqda.

Reytingda yuqori o‘rinlardan joy olgan brendlar qatorida Honda, Toyota va Lexus ham bor. Biroq Lexus bu yil oltinchi o‘ringa tushib ketdi. Bunga ayrim modellarning ishonchliligi pasaygani va mashhur ES sedani vaqtincha taklifdan chiqarilgani sabab bo‘lgan.

Eng katta ijobiy siljishni Lincoln ko‘rsatdi. Brend bir yil ichida 17 pog‘onaga ko‘tarilib, sezilarli natijaga erishdi. Consumer Reports bunga Lincoln’ning model qatori eskirgan bo‘lsa-da, aynan shu omil avtomobillar ishonchliligini oshirganini sabab qilib ko‘rsatmoqda. Tesla ham sakkiz pog‘ona yuqorilab, reytingda holatini yaxshilagan.

Shu bilan birga, ayrim kompaniyalar uchun yangi modellar salbiy ta’sir ko‘rsatdi. Masalan, Audi’da yangi elektromobillar ishonchlilik bilan bog‘liq muammolar keltirib chiqardi va brend reytingda 10 pog‘onaga pastladi. Modellar soni kam bo‘lgan ishlab chiqaruvchilar esa bitta muvaffaqiyatsiz avtomobil sabab umumiy bahosini keskin yo‘qotishi mumkin. Chrysler bunga yaqqol misol bo‘lib, uning yagona miniven modellari ishonchliligi past baholangan.

Consumer Reports mutaxassislari xaridorlarga faqat umumiy brend reytingiga emas, balki tanlanayotgan aniq modelning Overall Score va prognoz qilinayotgan ishonchliligiga e’tibor qaratishni tavsiya qilmoqda. Hatto yuqori sifat bilan tanilgan brendlar ham ayrim muvaffaqiyatsiz avtomobillarni ishlab chiqarishi mumkinligi qayd etilgan.

Reyting:

Eslatib o‘tamiz, Kursiv Uzbekistan nashri avtomobillarda eng ko‘p uchraydigan muammolar haqida yozgan edi.