Samsung kompaniyasining yaqin oylarda taqdim etilishi kutilayotgan Samsung Galaxy S26 FE smartfoni 45 Vt quvvatli tezkor simli quvvatlash texnologiyasini qo‘llab-quvvatlashi mumkin. Bu haqda Sammobile nashri xabar bermoqda.
Yangi modelning quvvatlash tezligi avvalgi Galaxy S25 FE bilan bir xil bo‘lib qolishi kutilmoqda. Samsung o‘tgan yili FE turkumidagi smartfonlar uchun quvvatlash quvvatini 45 Vtgacha oshirgan edi. Yangi sertifikatlash hujjati kompaniya Galaxy S26 FE’da ham ushbu imkoniyatni saqlab qolishini ko‘rsatmoqda.
Nimalar ma’lum
Galaxy S26 FE quvvatlash tezligi bo‘yicha bazaviy Galaxy S26 flagmanidan ustun bo‘lishi mumkin. Avvalgi ma’lumotlarga ko‘ra, Galaxy S26 modeli 25 Vt tezkor quvvatlash bilan cheklanadi. Shunday qilib, narxi nisbatan arzonroq bo‘lishi kutilayotgan FE modeli flagman smartfondan tezroq quvvatlanadi.
Oddiy model emas
Galaxy S26 FE’ning boshqa texnik xususiyatlari ham avvalroq internetda paydo bo‘lgan. Qurilma Samsung tomonidan ishlab chiqilgan Exynos 2500 protsessori hamda kamida 8 GB tezkor xotira bilan jihozlanishi mumkin. Taqqoslash uchun, Galaxy S25 FE smartfonida Exynos 2400 chipi va shunga yaqin hajmdagi tezkor xotira qo‘llanilgan.
Hozircha yangi smartfonning batareya sig‘imi, kameralar tizimi va rasmiy sotuv narxi haqida tasdiqlangan ma’lumot yo‘q. Samsung ham Galaxy S26 FE’ning taqdimot sanasini rasman e’lon qilmagan. Qurilma yaqin bir necha oy ichida namoyish etilishi kutilmoqda.
Avvalroq «Kursiv» Samsung Galaxy S25 smartfonining narxi pasaygani haqida yozgan edi.
