Honor kompaniyasining yangi Honor Win 2 va Win 2 RT smartfonlari Xitoyda 3C sertifikatidan o‘tdi. Bu haqda Gizmochina nashri xabar bermoqda.
Yangi ma’lumotlar Honor Win 2 seriyasi rasmiy taqdimotga yaqinlashayotganini ko‘rsatmoqda. Win 2 avvalgi avloddagi 100 Vt quvvatlash imkoniyatini saqlab qoladi. Win 2 RT esa oldingi modeldagi 100 Vt o‘rniga 90 Vt quvvatlash bilan chiqishi mumkin.
Win 2 10 000 mA·soatdan katta batareya olishi mumkin
Insayder Digital Chat Station ma’lumotiga ko‘ra, Honor Win 2 bu yilgi unumdor smartfonlar orasida noodatiy apparat kombinatsiyasiga ega bo‘lishi mumkin.
Smartfon Qualcomm Snapdragon 8 Elite Gen 6 protsessori, 10 000 mA·soatdan katta batareya, ichki sovitish ventilyatori va yuqori yangilanish chastotasiga ega 2K ekran bilan jihozlanishi kutilmoqda.
Bu ma’lumotlar avvalroq tarqalgan sizib chiqishlarga ham mos keladi.
Ekran 185 Hz bo‘lishi kutilmoqda
Oldingi ma’lumotlarga ko‘ra, Honor Win 2 6,89 dyuymli OLED displeyga ega bo‘lishi mumkin. Ekranning yangilanish chastotasi 185 Gts gacha yetishi kutilmoqda.
Shuningdek, qurilmada ekran ostiga o‘rnatilgan ultratovushli barmoq izi skaneri bo‘lishi mumkin. Hozirgi Honor Win modeli 6,83 dyuymli ekran bilan jihozlangan, ya’ni yangi avlod displeyi biroz kattaroq bo‘lishi kutilmoqda.
Win 2 RT boshqa protsessor olishi mumkin
Honor Win 2 RT esa Snapdragon 8 Elite Gen 5 protsessori bilan jihozlanishi kutilmoqda. Bu chip hozirgi Honor Win avlodida ham qo‘llanadi.
Shuningdek, Honor yangi seriyani uchta modelgacha kengaytirishi mumkin. Avvalroq Win 2 va Win 2 RT bilan birga yuqori darajadagi Win 2 Pro Max modeli ham paydo bo‘lishi mumkinligi haqida ma’lumotlar tarqalgan edi.
Avvalroq «Kursiv» Honor Magic 9 seriyasining ranglari va xotira variantlari ma’lum bo‘lgani haqida yozgan edi.
